ملی خوفسیزلیک کینگش دفتری نینگ اعلام قیلیشیچه، محبوسلرنینگ قوییب یوباریش پروسهسی یکونلنگن. مذکور نهاد بوگون (پنجشنبه ۱۳- سنبله) توشدن کیین بیر خبرنامه ترقهتیب ایتیشیچه، افغانستان دولتی تینچلیک مصلحتی لویه جرگه نینگ قراری و افغانستانلیکلرارا سوزلشوولر باشلهنیشی اوچون طالبلرنینگ ۵ مینگ محبوسی قوییب یوباریلیش پروسهسینی یکونلنتیرگن.
خبرنامهده کیلیشیچه، مذکور محبوسلر آلدیندن طالبان آرقهلی تیارلنگن رویخط اساسیده دولت نینگ قماقخانهلریدن قوییب یوباریلگن.
بیراق ملی خوفسیزلیک کینگش دفتری نینگ کوپهیتیریشیچه، طالبلرنینگ ۵ مینگ محبوسیدن یالغیز بیر نیچه کیشی کیم اولرنینگ حقیده «خلقارا عکسالعمللر بولگن» قوییب یوباریلمهگن. بو نهاد گه کوره، اوشبو قیینچلیک نی حل ایتیش اوچون دیپلوماتیک سعی و حرکتلرنی دوامی بار.
شونینگدیک ملی خوفسیزلیک کینگش دفتری سوزلاوچیسی جاوید فیصل نینگ یازیشیچه، طالبان قولیگه اسیر بولگن کماندولر طالبان گروهی نینگ ۴۰۰ محبوسیدن کوپینچهسی قوییب یوباریلگنیدن کیین آزاد ایتیلگن.
بیراق جناب فیصل افغانستان حکومتی نینگ قولیگه قالگن طالبان محبوسلری حقیده آرتیق تفصیلات بیرمهگن.
ملی خوفسیزلیک کینگش دفتری سوزلاوچیسی، تینچلیک سوزلشوولری تیزلیککه باشلهنیشی حقیده امیدوارلیک بیلدیرگن.
شونینگدیک رویترز خبرگزارلیگی نینگ گزارشی گه کوره، افغانستان حکومتی طالبان نینگ ۷ محبوسی نی قطر گه انتقال بیریلیشی نی ایستهیدی. بو ۷ محبوس قطر ده نظارت آستیده قالیشی گه قرار قیلینگن.
طالبان نینگ مذکور ۷ محبوسی فرانسه و استرالیا یشاوچیلری نینگ اولدیریشی گه عیبلنگن. بوندن آلدین مذکور مملکتلر افغانستان دولتیدن اوشبو محبوسلر قوییب یوباریلمهیشی نی سورهگن ایدی.
مذکور خبرگزارلیک افغانستانلیک بیر رسمیدن نقل قیلیب یازیشیچه، گرچند افغانستان حکومتی تشقی مملکتلر یشاوچیلری نینگ اولدیریلیشی گه عیبلنگن محبوسلر قوییب یوباریلمهسی گه قرار آلگن ایدی، بیراق حاضر اولرنینگ موضوعی اوزگرگن و اولر تیزلیککه قوییب یوباریلهدی.
شونینگدیک غربی دیپلماتلر و طالبان گروهیدن قطار منبعلر رویترز بیلن صحبت اوتکزیب و مذکور محبوسلر قطر ده انتقال تاپیش موضوعی نی تصدیقلهگن.
