خپل‌سرو وسله‌والو او ځېنو وکیلانو تخار ناامنه کړی

د تخار ولایت بنګي ولسوالۍ سلګونو اوسېدونکیو د نامسوولو وسله‌والو پر وړاندې اعتراض کړی دی.

دوی وايي، دغه نامسووله وسله‌وال پر خلکو ظلم زیاتی کوي او د ملي شورا دوو غړیو عبدالواحد فقیرزاده او قدرت‌الله ذکي له‌خوا یې ملاتړ کېږي.

د اعتراض کوونکیو په وینا، بنګي ولسوالۍ کې د نامسوولو وسله‌والو ترمنځ نښتې؛ ښوونځیو ته د ماشومانو د ورتګ مخنیوی کړی دی.

شکایت کوي، د تخار سیمه‌ییزه اداره له نامسوولو ټوپکوالو ځنې د وسلو را ټولولو توان نه لري.

د تخار د والي ویاند سنت تیمور هم مني چې د نامسوولو وسله‌والو بې‌وسلې کول د دوی له توانه پورته کار دی.

هغه زیاتوي، د پارلمان یو له وکیلانو د بنګي ولسوالۍ په ناامنیو کې لاس لري، خو نوم یې اخلي.

ورته وخت کې په ولسي جرګه کې د تخار د خلکو استازی قدرت الله ذکي د اعتراض کوونکیو د ادعاوو په رد وايي، له نامسوولو وسله‌والو ملاتړ نه کوي او د بنګي ولسوالۍ د اوسېدونکیو ستونزو هواري له‌پاره تخار ته تللی دی.

له هڅو سره سره مو ونشو کولی په شورا کې د تخار د خلکو استازي د عبدالواحد فقیرزاده نظر ترلاسه کړو.

له دې ټولو سربېره، د بنګي ولسوالۍ اعتراض کوونکي خبرداری ورکوي که حکومت یې امنیت ټینګ نه کړي د ولسي جرګې او ولسوالیو شوراګانو ټاکنو کې ګډون نه کوي.