د افغان سولې لپاره د امریکا د بهرنيو چارو وزارت ځانګړي استازي زلمي خلیلزاد پر ټوېټر ليکلي چې نه یوازې افغان خواوې مخامخ خپلو کې خبرې کوي، بلکې د خبرو له لارې د یوه سیاسي جوړجاړي او افغانستان کې د سولې لپاره پراخ نړیوال ملاتړ شته.
خلیلزاد وايي، اړتیا ده چې رامنځته شوي فرصت نه ګټه واخیستل شي ځکه چې په خبره يې افغانستان لپاره د سولې خبرې یو بېساری فرصت دی.
د زلمي خلیلزاد دغه څرګندونې داسې مهال دي چې قطر کې د بینالافغاني خبرو له پرانیستونکې ناستې یوه اوونۍ وروسته لا هم د طالبانو او افغان دولت ترمنځ د خبرو پر کړنلاره او کاري اصولو بحثونه دوام لري.
د سولې په چارو کې د دولت وزارت وايي، د دواړو لوريو د تماس ډلې په منظم ډول ناستې لري او هڅه کېږي چې هرڅه ژر یو ګډ دریځ رامنځته شي.
د اوربند مسله هم د افغان دولت او طالبانو ترمنځ د بحث یوه مهمه موضوع ده.
