د اسلامي وحدت ګوند مشر د ټاکنو وروستۍ پایله له درغلیو ډکه بولي او وايي، خلک د کمېسیون د دې پرېکړې پر وړاندې ولاړ دي او چا ته به اجازه ور نه کړي چې په تقلبي رایو واک وچلوي.
کریم خلیلي نن په کابل کې د یوې خبري غونډې پر مهال وویل، افغانانو تمه لرله چې د ولسمشري ټاکنې د ولسي جرګې له هغو ښې وشي، خو د عامه تمې پر خلاف په دغو ټاکنو کې هم درغلي وشوه.
خلیلي د عبدالله عبدالله په مشري د ثبات او همپالنې ټیم له لوري د «ټولشموله» حکومت ملاتړ وکړ او ویې ویل چې پر خپلې پرېکړې به ودرېږي. نوموړي د یاد حکومت د ملاتړ لامل د درغليو پر وړاندې درېدل په ګوته کړل.
نوموړي د ولسمشري ټاکنو د پایلې پر باطلولو ټینګار وکړ او ټینګار یې وکړې چې له دې پرته به یو ټولشموله حکومت جوړ او هېڅوک به یې مخه ونیسي.
هغه د نړیوالو بنسټونو پر مانا لرونکې چوپتیا نیوکه وکړه او ویې ویل چې نړیوالو بنسټونو څرنګه چې د ولسي جرګې ټاکنو په تړاو دریځ غوره کړی و، د ولسمشري هغو په تړاو یې هم غوره کړی دی.
خلیلي له نړیوالې ټولنې وغوښتل چې د ټاکنو د پایلې پر وړاندې ودرېږي او په وینا یې، موږ بغاوت نه دی کړی او یوازې د درغلیو پر وړاندې ولاړ یو.
د ټاکنو خپلواک کمېسیون له پنځه میاشتني ځنډ وروسته د سهشنبې په ورځ محمداشرف غني د ولسمشري ټاکنو ګټونکی اعلان کړ، خو د نوموړي رقیب عبدالله عبدالله دا پایله ونه منله او ویې ویل چې د ثبات او همپالنې ټیم به یو ټولشموله حکومت جوړ کړي.
