جنجال اوتگن آقشامگی جمهور رییس نینگ خبری انجمن آلیب بیر هفتهلیک سفری بارهسیده معلومات بیریش اولتیریشده خبرچیلردن بیریگه جواب بیرمهگنی و جمهور رییس نینگ تن ساقچیلری تامانین خبرچیلر حقارت قیلینگنیدن باشلندی.
نیچه ساعتدن سونگ هم جمهور رییسلیک سرایی مطبوعات دفتری سرپرستی شاهحسین مرتضوی نینگ تیلویزیونی برنامهلردن بیریده: «بیرخبری نهاد چمهسی ایکی مینگ خبرچی کارتینی ترقتگن و شوحاضر بیر کچالو ساتهدیگن هم خبرچی بولگن» دیدی. اما سوز ایرکینلیگی اوچون میلیونلب دالر هزینه قیلینگن بیر مملکتده و هرکیم فردی و رسانهیی حقوقلردن گپیرهدی، نیگه خبرچیلر جمهور رییسلیک سراییده بونقه برخورد بیلن روپهره بولدی؟
خبرچیلردن بیرقطاری ارگ ایچیدهگیلرنینگ بونقه برخوردلرینی استبداد دیب بیلهدیلر و مملکده رسانه کیلهجگیدن تشویشدهلر. خبرچیلر، جمهور رییس و مطبوعات دفتری نینگ سرپرستی افغانستان رسانهیی خانهدانیدن کیچیریم سورهسینلر دیگنلر.
خبرچی و رسانهیی فعال باعث حیات، ارگ رسمیلری نینگ رسانهلر بیلن برخوردلری شونقه بولسه، سوز ایرکینلیگی فاتحهسینی اوقیش کیرهک دیدی.
باشقه بیر خبرچی نینگ سلاموطندارگه ایتیشیچه، جمهور رییس غنی و شاهحسین مرتضوی نینگ رسانهلرگه نسبتن قیلگن برخوردلری دیکتاتورانه و استبدادنی کورستهدی و حکومت مملکت رسانهسینی چیکلش بیلن وضعیتنی سانسور قیلماقچی بولهدی.
نوریه نزهت نادری هم بونقه برخوردلر سوز ایرکینلیگینی ایاغ آستی قیلیش و بولر باید خبرچیلردن کیچیریم سورهسه دیدی.
خبرچیلرگه کوره، اوشندهیکه جمهور رییس اوزی اطلاعاتگه قول تاپیش قانونینی توشیح قیلگن، بیراق عملگه کورسهتیشیچه، اوشبو قانونگه اوزی حرمت قیلمیدی.
افغانستان خبرچیلری نینگ مصونیت کمیتهسی باشلیغی نجیب شریفی نینگ سلاموطندارگه ایتیشیچه، جمهور رییس نینگ خبرچیلرگه قیلگن برخوردی حکومت رسمیلری نینگ خبری اولتیریشلردهگی عادتلریگه قرشی ایدی.
او، شاهحسین مرتضویدن ایسته یدی حقارتلی سوزی اوچون مملکت رسانهلریدن کیچیریم سورهسین.
بو بیرینچی مرته ایمس جمهور رییسلیک سرایی تامانیدن رسانهلر حقارت قیلینهدی. بوندن آلدین هم جمهور رییس بلخ ولایتیده اردو کوچلری بیلن اوچرهشگنده رسانهلردن باد چیقهدی دیگندی. جمهور رییس نینگ بو سوزی کوپلب قرشیلیکلر بیلن روپهره بولگن ایدی.
