تینچلیک عالی کینگشینینگ ایتیشیچه، روسیهنینگ بو قرارینی خوش قرشیلهیدی.
سلاموطندارگه صحبت بیرگن تینچلیک عالی کینگشینینگ خلق ارا ایشلری بوییچه مصلحتچیسی اسماعیل قاسمیارنینگ ایتیشیچه، افغانستانده تینچلیک تأمینلنیشی خصوصیده، روسیه سعی و حرکتلرینی تینچلیک عالی کینگشی خوش قرشیلهیدی.
اوتگن کون روسیه تشقی ایشلر وزیری سرگی لاوروف نینگ ایتیشیچه، مملکتی افغانستان حکومتی و طالبلر آرهسیده تینچلیک خصوصیده، یولگه قوییلهدیگن سوزلشوولرگه میزبانلیک قیلهدی.
جناب قاسمیارگه کوره، کیلهجک یقین آرهده تینچلیک توغریسیده کته بیر ییغین یولگه قوییلیشی ممکن.
باشقه تاماندن، جمهورلیک ریاستی مطبوعات دفتری سرپرستی شاهحسین مرتضوینینگ ایتیشیچه، تینچلیک دروازهسی دولتگه قرشی بوتون مخالفلر اوچون آچیق دیر. جناب مرتضوی، تینچلیک لایحهسی افغانستان حکومتی تامانیدن مدیریت بولیشی اوستیگه تأکیدلیدی.
عین حالده، سیاسی ایش بیلرمانلردن بیرقطاری، روسیهنینگ سونگی قراری توغریسیده فرقلی فکر بیلدیرهدیلر.
سلاموطندارگه صحبت بیرگن سیاسی ایش بیلرمان اکبرخان فولادنینگ ایتیشیچه، روسیه بو ایشنی افغانستانده اوز منفعتی اوچون عملگه آشیرهدی و بونگه ایشانیب بولمهیدی.
جناب فولادگه کوره، حاضر افغانستاننینگ ایچکی ایشلریده روسیه ارهلشهدی و آچیق اورنک، مملکت شمالیدهگی اوروشده مسکونینگ قولی بارلیگی دیر.
بیراق، سیاسی ایش بیلرمانلردن باشقه بیری اسحاق اتمرنینگ ایتیشیچه، سونگی نیچه ییلده روسیه بیلن طالبلرنینگ علاقهسی یخشی بولگن و پوتین دولتی اوتمیشگه نسبَتَن منطقه اویینلریده سهم آلیشنی ایستهیدی.
سونگی کونلرده افغانستان دولتی و طالبلر آرهسیده تینچلیک سوزلشوولری باشلهنیشی توغریسیده، سعی و حرکتلر باشلنگن. اوشبو سعی و حرکتلر ایجابی نتیجه بیریشی توغریسیده قضاوت قیلیش اوچون حاضر وقت دیر.
