پاکستان باش وزیرینینگ ملی خوفسیزلیک همده خلق ارا ایشلری بوییچه مصلحتچیسی سرتاج عزیز، حقانی ترور ترماغی شکست ییگن بیر ترماق، بو شبکه بوندن بویان افغانستانده ترورچیلیک فعالیتلرنی عملگه آشیره آلمسلیگینی ایتگن.
سرتاج، بو مملکتنینگ ملی کوچلری شمالی وزیرستانده حقانی ترور ترماغیگه قرشی اوتکزگن حربی عملیاتده بوتونلی نابود ایتیلگن دیگن. او، پاکستان بوندن بویان مذکور ترماققه مملکتیدن توریب باشقه دولتلرگه قرشی هجوم قیلیش اوچون رخصت بیریمسلیگینی معلوم قیلگن.
اما امریکه و افغانستان حکومتی شمالی وزیرستانده حقانی ترور ترماغی نابود ایتیلیشی اوچون پاکستان تامانیدن «ضرب عضب» ناملی حربی عملیات موفق اوتکزیلگنی توغریسیده شبهه بیلدیریب، پاکستان بو ترماققه قرشی جدی سعی وحرکت قیلمگن لیگیگه ایشانهدی.
افغانستان ملی خوفسیزلیک ادارهسی بوندن ایکی کون آلدین حقانی ترماغیگه قرهشلی 20 کیشیلیک بیر گروه ترروچی قولگن آلینگنلیگیدن خبر بیرگن ایدی. ملی امینت ادارهسیگه کوره، اوشبو گروه اخیرگی وقتلرده کابلده صادر ایتیلگن هجوملرده قولی بولگن.
باشقه تاماندن امریکه تشقی ایشلر وزیری جانکری ایکی کونلیک سفر بیلن پاکستانگه باریب، او مملکت رسمیلری بیلن اوچرهشیب ایتیشیچه، طالبلر، لشکر طیبه و حقانی ترماغی فعالیتینینگ دوامی منطقه و امریکه اوچون توغریدن توغری تهدید دیر.
جانکری، پاکستان دولتینینگ حقانی ترور ترماغی نابود ایتیلیشی اوچون آلیب بارگن فعالیتی ییترلی ایمس دیگن.
افغانستان حکومتی سرتاج عزیزنینگ سوزلریگه شک و تردید بیلن باقهدی. رسمی کابل، پاکستان حکومتی ترورچیلر مرکزی اینیقسه حقانی ترور ترماغی نابود ایتیلیشی اوچون دییرلی سعی وحرکت قیلمهگن لیگینی اظهار ایتگن.
جمهور رییسلیک سرایی سوزلاووچیسینینگ اورین باسری سیدظفر هاشمی، پاکستان هنوزهم ترورچیلرنی حمایت قیلهدی دیگن.
سیاسی تحلیلچی همده نمایندهلر مجلسینینگ اعضاسی عبدالقیوم سجادی، افغانستان هنوز هم پاکستان توغریسیده معین سیاستگه ایگه بولمی هر دایم عکس العمللیک سیاستدن ایش آلگن لیگینی بیلدیرگن.
جناب سجادینینگ اظهار قیلیشیچه، هنوزگچه هم افغانستان پاکستان مقابلیده فعال و ابتکارلی سیاست اوینه آلمهگن. سجادی، دستلب پاکستان برابریده عمومی ذهنیت شکیلهنیشی لازم و اوندن سونگ بو مملکت توغریسیده معین استراتیژیک ایشلب چیقاریش کیرهک.
شونینگدیک جناب سجادی، افغانستان پاکستان برابریده ایش آلهدیگن سیاستیدن واز کیچیب ناتو و عامهوی فکر آرقهلی بو مملکتگه باسیم اوتکزیشی بارهسیده تاکیدلهگن.
عین حالده، سیاسی تحلیلچیلردن محبالله شریفی نینگ سوزلریگه قرهگنده، افغانستان اوتگن 13 ییلده پاکستان مقابلیده ثابت سیاستگه ایگه بولمهگن.
امریکه تشقی ایشلر وزیرلیگینینگ سوزلاووچیسی مارک تونر، تینچ اهالی اولدیریلیشی آلدینی آلیش اوچون یگانه یول حقانی ترور ترماغی وطالبلرگه قرشی کورهشیش نینگ ایکی برابرگه آشیریش لیگی حقیده تاکیدلهگن.
شونینگدیک آق اوینینگ سوزلاووچیسی چوش ارنستگه کوره، جمهور رییس بارک اوبامانینگ ملی خوفسیزلیک مصلحتچیسی سوزان رایس پاکستانگه قیلگن سفریده او مملکتدن ترورچیلرگه قرشی کورهشیشنی سورهگن.
سوزان رایس، پاکستانلیک بلند مرتبهلی رسمیلرگه بو مملکت توپراغیدن افغانستانگه صادر ایتیلگه دیگن ترورچیلیک هجوملر امریکه اوچون چیدهب بولمیدی دیگن بیر مسالهدیگن.
حقانی ترور ترماغی امریکه تامانیدن قاره رویخطگه آلینگن ترورچی گروهلردن.
