دوشنبه – ییگیرمه بیرینچی جدی پاکستان پایتختی اسلامآباد ده افغانستان، پاکستان، چین و امریکا دولتلری ارا افغانستانده برقرارلیک اورنهتیش بارهسیده مذاکره اوتکزیلهدی. اوشبو مذاکرهلرده افغانستان دولتی بیلن جنگری گروهلر اورتهسیده اوتکزیلهجگ تینچلیک مذاکرهلری اوچون یول خریطهسی ایشلب چیقیلیب، تامانلرنی مذاکرهلر جریانیده اوز بویینلریگه آلهدیگن مسؤولیتلری اوستیده بحث ایتیلهدی.
رسمی کابل، یقین کیلهجکده جنگری طالبلر نمایندهلری بیلن دولت وکیللری اورتهسیده اوتکزیلیشی نظرده توتیلگن تینچلیک مذاکرهلری کوتیلگن نتیجهلر آلیب کیلیشیگه امیدوار کورینهدی.
پاکستان دولتینینگ طالبان نینگ ایریم گروهلرینی مذاکرهلر میزیگه آلیب کیلیشی بارهسیده بیرگن وعدهلری شونینگدیک رسمی اسلامآبادنینگ تینچلیک مذاکرهلری جریانیده اوز وعدهلرینی عملگه آشیریشی خصوصیده بیرگن وعدهلرینی عملگه آشیریشی جریانینی ختای همده امریکا تامانیدن کوزهتیلیشی افغانستان دولتینینگ نوبتدهگی مذاکرهلر نتیجهسیگه تاباره امیدوار ایتگن.
عین حالده امریکا و ختاینی افغانستانده تینچلیک اورنهتیش مسالهسیگه جدی راق تشبث کورسته یاتگنی هم دقتگه سزاوار نرسه. ایتیلیشیچه امریکا، افغانستان، پاکستان و چین تامانی تینچلیک مذاکرهلریده قتنشمهگن گروهلرگه قرشی حربی عملیاتلر اوتکزیلیشی بارهسیده هم کیلیشیب آلگنلیکلری تأکیدلنماقده.
.jpg)
افغانستان دولتی تینچلیک مذاکرهلری تیزراق باشلنیشینی ایستهیدی. رسمی کابل نظریدن مذاکرهلر باشلنیشی بیلن مملکت بویلب دولت کوچلری بیلن جنگریلر اورتهسیده آتش کیسین برقرار ایتیلیشی شرط. اما پاکستان تامانی بوکوندن باشلب افغانستان حربی کوچلرینی طالبانگه قرشی اوتکزیلهدیگن حربی عملیاتلری میزانینی کمهیتیریشی اوستیده تأکیدلهماقده. بو مسأله ینه بیر مرته افغانستان دولتی و افغانستان خلقینی پاکستاننینگ افغانستانده تینچلیک مذاکرهلریگه صمیمی یانده شمه یاتگنی بارهسیده شبهه لنتیرهدی.
پاکستاننی، افغانستانده برقرارلیک اورنهتیش جریانیده مهم رول اوینهشی هیچ کیمگه سِر ایمس البته. نیگه دیگنده افغانستانده دولتگه قرشی جنگ قیلهدیگن قوراللی گروهلر پاکستان نینگ استخبارات ادارهلری تامانیدن یرهتیلگن و حاضرگه قدر اوشبو دولت تامانیدن حمایت ایتیلماقده.
طالبلر رهبرلرینی پاکستان نینگ ایما و اشاراتی سیز مستقل طرزده فعالیت آلیب بارهیشی و سیاست قیلیشی ممکن ایمس. مذکور گروهلر رهبرلری نینگ عایلهلری پاکستانده یشهیدیلر. اولرنینگ اساسی قرارگاهلری هم بو مملکتده جایلشگن. وغیابتدهگی تینچلیک مذاکرهلرینی نتیجه آلیب کیلیشی و یا شکستگه یوز توتیشی رسمی اسلامآباد ده تیگیشلی بیر نرسه.
پاکستان بلند مرتبهلی رسمیلری هم بو مسأله گه خلق ارا باسیملر همده دنیانینگ ییریک دولتلری جملهدن چین و امریکا باسیملری سیز افغانستانده تینچ تامینلنیشیگه راضی بولمسلیگی ممکن.
حاضر دنیاده وجودگه کیلگن ینگی وضعیت یعنی داعش نینگ وجودگه کیلیشی و دنیا امنیتیگه تهدید ساله یاتگنی، اورته شرقده دوام ایتهدیگن نابرقرارلیکلر، اینیقسه ایران و عربستان اورتهسیده یوزهگه چیققن سونگی قرهمه قرشیلیکلر دنیانینگ ییریک دولتلرینی افغانستاننی نا تینچ بیر وضعیتده قالمسلیگی بارهسیده جدی راق اورینیشلریگه سبب بولگن عامللردن حسابلنهدی.
حاضرگی کونده تینچلیک مذاکرهلری قیته باشلنیشی و نتیجه آلیب کیلیشی بارهسیدهگی امیدلر کوچه یماقده. افغانستان، پاکستان، امریکا و ختای نینگ بو خصوصده عملگه آشیرهدیگن تشبثلری قندهی نتیجهلر آلیب کیلیشی بارهسیدهگی سوالگه حاضردن انیق بیر جواب قهیتیریش قیین البته.
بو سوراققه یقین کیلهجکده زمان نینگ اوزی جواب تاپهدی. افغانستان دولتینینگ مملکتده دوام ایتهدیگن موجود بحراننی تینچ یوللر آرقهلی برطرف ایتیشی اوچون عملگه آشیرگن سعی و حرکتلری لازم ثمره بیرمه گن.
افغانستان بو یولده کته قربانلیکلر بیریشلیککه هم مجبور بولگن. افغانستان سابق جمهور رییسی و تینچلیک کیلنگشی نینگ سابق باشلیغی مرحوم پرفیسور برهانالدین ربانی طالبلر تامانیدن کیلگن نماینده طرفیدن عملگه آشیریلگن انتحاری هجومده هلاک بولگن ایدی. اوتگن ییلی پاکستان واسطه چیلیگیده پایتخت اسلامآباد ده افغانستان دولتی و جنگری طالبلر نمایندهلری اورتهسیده ایلک مرته رسمی مذاکرهلر باشلنگن ایدی.
اوشبو مذاکرهلر هم طالبلرنینگ سابق رهبری ملامحمد عمر وفاتی خبری ترقتیلیشی بیلن توختب قالگن ایدی. دنیانینگ ییریک کوچلری قالهویرسه پاکستان بیلن یقین علاقهده بولگن کوچلی مملکتلر یعنی امریکا و چیننی تینچلیک مذاکرهلری نتیجه آلیب کیلیشی اوچون رسمی اسلامآبادگه کیرهکلی باسیملر اوتکزیشی همده مذکور مذاکرهلر ثمره بیریشی اوچون اساسی شرطلردن سنلهدی.
کیینگی اوزگریشلر اوشبو دولتلرنی پاکستاننی بو مسأله جدی راق بیر شکلده یانده شیشگه اونده یاتگنی حس ایتیلماقده. باشقه بیر تاماندن قوشنی مملکت پاکستانده حکم سورهدیگن موجود وضعیت جملهدن ناتینچلیکلر قالهویرسه پاکستان نینگ مرکزی آسیا انرژیسیگه بولگن احتیاجی رسمی اسلامآبادنی افغانستانده تینچلیک اورنهتیش بارهسیده مجبور ایته یاتگن باشقه عامللردن سنهلهدی.
افغانستانده نابرقرارلیکلر دوام ایتر ایکن، افغانستان حدودی آرقهلی عملگه آشیریلیشی نظرده توتیلگن ایکی اولکن اقتصادی لایحه جملهدن تاپی و کاسا بیرمینگ پروژهلریدن فایدهلنیش ممکن ایمسلی انکار ایتیب بولمهیدیگن حقیقت حسابلنهدی.
