پاکستان باش وزیری شاهد خاقان عباسی جمعه کونی افغانستان جمهور رییسی محمد اشرف غنی چقیریغی اساسیده کابلگه کیلدی. پاکستان باش وزیرلیگی ترقهتگن بیاناتده، شاهد خاقان عباسی افغانستانده تینچلیک و برقرارلیک نی تأمینلش اوچون طالبلر بیلن تینچلیک مذاکرهلرینی قوللب قووتلش و ایکی تامان ارا همکارلیکلرنی مستحکملش مقصدیده عملگه آشیریلیشی قید ایتیلگن.
مذکور بیاناتده، پاکستان و افغانستان بلند مرتبهلی رسمیلرینی ایکی مملکت ارا باردی کیلدینی آسانلشتیریش، افغانلرنی پاکستانده دوالنیشی و تحصیل قیلیشی همده تجارت و ترانزیت بوییچه همکارلیکلرنی مستحکملش کبی موضوعلر اوستیده مذاکره آلیب باریشلری هم تاکیدلنگن.
اما افغانستان حکومتی گه قرهشلی بیر منبع، تامانلر ارا مذاکرهلرده پاکستان حدودیدن افغانستان گه راکت حملهلری، طالبلرنینگ پاکستاندهگی مرکزلری همده رسمی اسلامآبادنینگ افغانستانده دوام ایتهدیگن جنگلرده قولی بارلیگی اوستیده بحث ایتیلیشینی بیلدیرگن.
عین حالده پاکستان تشقی ایشلر وزیرلیگی شاهد خاقان عباسینینگ کابل سفری چاغیده کابل و اسلامآباد بلند مرتبهلی رسمیلرینی اسلامآباد تامانیدن تیارلنگن "عمل برنامهسی" محاکمه ایتیلیشینی معلوم قیلگن.
افغانستان اجرائیه ادارهسی رسمیلری گه قرهگنده مذکور برنامه اساسیده پاکستان و افغانستان دولتلری ترورچیلیککه قرشی کورهش همده طالبلرنی تینچلیک مذاکرهلری گه کوندیریش و ترغیب ایتیش بارهسیده همکارلیک قیلهدیلر.
پاکستاننینگ افغانستاندهگی ایلچیسی زاهد نصرالله خان، پاکستان باش وزیرینینگ افغانستان سفری ایکی مملکت مناسبتلریده ینگی بیر صحیفه آچیشینی معلوم قیلگن.
شاهد خاقان عباسی سفری دن بیر نیچه کون آلدین پاکستان ملی امنیت مصلحتچیسی باشچیلیگیده بیر رسمی هیأت کابل گه کیلیب، افغان رسمیلری بیلن اوچرهشگن ایدی. افغانستان ملی بیرلیک حکومتینینگ اجرائیه ادارهسی اوشبو مذاکرهلردن راضی ایمس. چونکه تامانلر ارا اوتکزیلگن بحثلرده طرفلر پاکستان حدودیده ترورچیلرنی نابود ایتیش مسئلهسی اوستیده سونگی بیر توختم گه کیلمهگنلر.
پاکستان باش وزیری ایکی مملکت ارا مناسبتلر سُستلشگنیدن تخمیناً اوچ ییل اوتیب باریشدن سونگ افغانستان گه سفر قیلماقده. اوشبو مدت ایچیده پاکستان ترورچیلیککه قرشی کورهشده اوز وعدهلری گه وفا قیلمهگنی اوچون دنیا جماعهچیلیگی اینیقسه غرب دولتلری تامانیدن جدی باسیملرگه روبه رو بولگن.
اوتمیشده پاکستاننی هر تامانلمه قوللب قووتلب کیلگن امریکا دولتی هم مثلی کوریلمهگن پیمانه ده رسمی اسلامآبادگه باسیم اوتکزماقده.
شوندهی بیر وضعیتده پاکستان باش وزیرینینگ افغانستان سفری اساساً پاکستاننی دنیا تامانیدن روبهرو بولگن تضییقلردن قوتقریش اوچون عملگه آشیریلهدی.
رسمی کابل اوزاق ییللردن بیری پاکستاننی ترورچیلرنی حمایت ایتیب کیلهیاتگنلیککه عیبلهیدی. غرب دولتلری اینیقسه رسمی واشینگتن پاکستان دولتی ترورچیلرنینگ پاکستاندهگی مرکزلرینی یوق قیلیش اوچون ییترلی پیمانه ده عمل قیلمهیاتگنی دن خفه.
عباسینینگ کابل سفری ایجابی نتیجه آلیب کیلهدیمی؟
رسمی اسلامآبادنینگ کیینگی ییللرده ترورچیلیککه قرشی کورهش بوییچه افغانستان دولتی و دنیا جماعهچیلیگی گه بیرگن وعدهلری پوچگه چیققنی نظرده توتیلگنده بو مرته هم پاکستاننی موجود معمالرنی برطرف ایتیش اوچون عملی قدملر تشلشی گه ایشانیش قیین البته.
تجربه دن کیلیب چیقیب ایتگنده پاکستان، افغانستان حدودیده اوزی نینگ بلند پرواز منفعتلری نی قولگه کیریتمه گونگه قدر رسمی کابل و دنیانی الده شگه اورینه دی. رسمی اسلام آباد افغانستان حکومتی نی "اندازه "دن کوپراق اسلام آباد دشمنی سنلگن هندوستانگه یقیلشگنی نی ادعا قیله دی. پاکستان رسمیلری نینگ دعوا قیلیشلریچه هندوستان، افغانستان آرقلی پاکستان منفعتلری گه تهدید سالیب کیلماقده. افغانستان تامانی اوشبو ادعالرنی هر دایم رد قیلیب کیلگن.
اسلام آباد اوزاق ییللردن بیری اسلامی کوز قره شده گی قوراللی گروهلر همده ترورچیلرنی هندوستان و افغانستان گه باسیم اوتکزیش اوچون سؤ استعمال ایتیب کیلماقده. طالبلر، حقانی ترور ترماغی و باشقه بیر قطار ترورچی آقیملر پاکستان منفعلری گه خذمت قیلیش مقصدیده افغانستان ده برقرارلیکنی برهم اوریب کیلماقده لر.
در واقع رسمی اسلام آباد افغانستانده گی بحران نی برطرف ایتیش و یا دوام ایتیشی اوچون اوته مهم و حل ایتووچی رول اوینه یدی. بوکونگه کیلیب بونی منطقه و دنیا دولتلری یخشی انگله گن.
افغانستانده برقرارلیکنی تامینلش اوچون ییریک قدرتلر نی اوزارا کیلیشیب، پاکستان دولتی گه آرتیقچه باسیملر اوتکزیشلری گه جدی احتیاج سیزیله دی. رسمی اسلام آباد نی هم سیاسی یوللر آرقلی افغانستانده کوزله گن معقول منفعتلرینی تعریف ایتیشی ضرور.
افغانستان دولتی و خلقی اوچون مملکتده تینچلیک اورنه تیلیشی سوو و هوادیک اهمیتگه ایگه. رسمی کابل نی هم منطقه ده ترورچیلیکنی نابود ایتیش و مملکتده برقرارلیک نی تامینلش اوچون دنیا و منطقه دولتلری همکارلیگی سیز مؤفقیت قازانیشی مشکل.
افغانستان دولتی نی سونگی اوچ ییل دوامیده اوروش و تینچلیک مسئله سی بوییچه سیاسی ساحه ده ایریم یوتوقلرگه ایشگنی گه قره مه ی، هلی بو باره ده ینه کوپ ایشلرنی عملگه آشیریشی کیره ک.
رسمی اسلام آباد افغانستان دولتی بیلن آلدینگی دیک وقت اوغیرلش اوچون مذاکره اوتکزه دی. کابل ایسه بونی یخشی انگله یدی. انه شو باعث افغانستان دیپلوماسی ارگانلری آلدینگی گه کوره فعال راق بولیب، دنیا دولتلری نی پاکستان نی افغانستان تینچلیگی باره سیده صمیمی همکارلیک قیلیش لیککه راضی ایتیشی اوچون ینه ده جدی باسیملر گه روبه رو قیلیشی درکار. عکس حال وضعیت سیره اوزگرمه یدی. افغانستان خلقی ینه کته قربالیک لر بیریش لیککه مجبور بوله دیلر.
