.jpg)
افغانستان نینگ شمالی فاریاب ولایتیده امنیت وضعیتی تاباره یامانلشیب باره یاتگنی بارهسیده خبرلر نشر ایتیلماقده. سونگی خبر فاریاب ولایتی نینگ کوهستان تومنی مزکری شنبهدن یکشنبه اوتر کیچهسی جنگری طالبلر تامانیدن اشغال ایتیلگنی حقیده ایدی.
بوندن چمهسی بیر هفته آلدین مذکور تومن مرکزی اوستیگه شدتلی هجوملر دوام ایته یاتگنی و دولتگه طرفدار محلی کوچلر نینگ بیر قطار پستهلری جنگریلر طرفیدن باسیلگنی بارهسیده خبر بیریلگن ایدی. دولت کوهستان تومنی مرکزینی طالبلر اشغالیگه اوتیشی خوفینی برطرف ایتیش اوچون 30 کیشی لیک بیر گروه کوماندو کوچلرینی او ییرگه جونتگن ایدی.
آلینگن معلوماتلرگه کوره طالبلر تومن مرکزینی قولگه کیریتیب دولت بناسی نینگ بیر قسمینی اوتگه یاندیرگنلر. دولت کوچلری او ییردن آرقهگه چیکینیب باشقه بیر قورغان (قلعه) ایچیگه جایلشیب آلگنلر.
کوهستان تومنی نینگ محلی رسمیلری تیز آره ده محل گه ییترلی اندازه ده قوشیمچه حربی کوچلر سفربر ایتیلیب، تومن مرکزی آزاد ایتیلمهگن تقدیرده او ییرده انسانی فاجعه یوز بیریشی بارهسیده آگاهلنتیرگنلر.
فاریاب نینگ کوهستان تومنی مرکزینی ولایت مرکزی میمنه شهریگه باغلهیدیگن یول بیر یریم ییلدن بیری دولتگه قرشی جنگ قیله دیگن قوراللی جنگریلر تامانیدن نظارت ایتیلهدی؛ در واقع اوشبو تومنی مرکزی هوا آرقهلی تأمینلنهدی. بوندهی بیر وضعیتده کوهستان تومنی مرکزیده دولت حاکمیتینی اسرهب توریش آسان کیچمهیدی.
.jpg)
کوهستان تومنی نینگ طالبلر اشغالیگه اوتیشی فاریاب ولایتی نینگ باشقه بیر قطار حدودلری جملهدن پشتونکوت تومنی امنیتینی بوزیب، ولایت مرکزی میمنه شهری امنیتینی جدی خطرلر بیلن روبه رو قیلهدی.
محلی همده مرکزی دولت نینگ بلند مرتبهلی ملازملری مسئله نینگ نه قدر قلتیس ایکنی لیگینی انگلهگن حالده کوهستان تومنیده جنگری طالبلرگه محکم ضربهلر بیریب، او ییرده دولت موضعلرینی مستحکملش اوچون اساسی چارهلر کوریشلری لازم. عکس حالده فاریاب ولایتی مرکزینی جنگریلر تهدیدلری برابریده اسرهش اوچون کتّه کوچ و امکان صرفلشگه توغری کیلهدی.
فاریاب ولایتی امنیتی سونگی بیر ییل ایچیده مثلی کوریلمهگن درجهده یامانلشگن. اندخوی تومنینی باشقه اوچ تومن – دولت آباد، شیرین تگاب و خواجه سبز پوش (جمعه بازار) آرقهلی میمنه شهریگه باغله یدیگن کتّه ترانسپورت قتناو یولی امنیتی بوزیلگن. سونگی بیر هفته ایچیده مذکور یول نینگ تخمیناً 20 کیلومتری جنگریلر نظارتیگه اوتگن.
حاضرگی کونده میمنه اندخوی کتّه ترانسپورت قتناو یولی یاقهسیده ییرلشگن جمعه بازار، شیرین تگاب و دولت آباد تومنلرینینگ کتّه قسمی جنگری طالبلر نظارتیده. سونگی بیر هفته ایچیده دولت آباد تومنی نینگ بیر قطار قیشلاغلری طالبلر نظارتیگه اوتیشی فاریابده وضعیتنی تاباره چیگیللشتیرگن.
.jpg)
افغانستان مرکزیده جایلشگن غور ولایتی نینگ فاریاب بیلن چیگرهداش تیوره تومنی مرکزینی طالبلر اشغالیگه اوتگنی تصدیقلندی. اوشبو تومننی جنگریلر نظارتیگه اوتیشی فاریاب نینگ ایریم تاغلی تومنلری جملهدن گرزیوان، کوهستان و بلچراغ امنیتی اوچون جدی تهدید سنهلهدی.
شمال نینگ باشقه بیر قطار ولایتلری جملهدن قندوز، بغلان و بدخشانده هم احوال یخشی ایمس. یقینده بدخشان ولایتی نینگ تگاب تومنیده جنگریلر بیر قطار پولیس عسکرلرینی اسیر آلیب اولردن اون بیر نفرینی قتل ایتگن. مذکور ولایت نینگ ایکّی تومنی هلی هم طالبلر نظارتیده قالماقده.
قندوز ولایتی نینگ خانآباد و قلعهزال تومنلریده طالبلر هجوملری اوج آلگنی بارهسیده خبرلر ییتیب کیلماقده. بغلان ولایتی نینگ بغلان مرکزی تومنیده هم جنگلر دوام ایته یاتگنی ایتیلهدی.
حاضرگی کونده شمال ولایتلری امنیتی مثلی کوریلمهگن درجهده یامانلشگن. بونگه کیم جوابگر؟
محلی اهالی همده ایریم سیاسی تیورهکلر مرکزی دولتنی شمال امنیتینی تأمینلشده بی فرق یاندهشه یاتگن لیککه عیبله یدیلر. حتا دولتده گی ایریم شخصلرنی اتهیلیب شمالنی اوروش اوچاغیگه ایلنتیرگن لیکلرینی هم ایته دیلر. اولرنینگ فکریچه دولت و غرب دولتلری شمالنی داعش مرکزیگه ایلنتیریش اوچون شمالی ولایتلری امنیتی مستحملش مسئلهسیگه بیفرق یانده شیلب حتا که ایریم حاللرده تیک اوچرلر آرقهلی شمالگه داعش جنگریلریگه حربی تخنیک و قورال اسلحه ییتکزیب بیره دیلر. اوشبو ادعالر هلیگچه بیران بیر مستقل منبع تامانیدن تصدیقلنمه گن.
شمال قاله بیرسه مملکت بویلب امنیتنی تأمینلش مسوولیتی دولت مسووللریگه قیتهدی. اما امنیت ارگانلری بلند مرتبهلی رسمیلری خارجدن باشقریله دیگن هجوملر مملکت نینگ ایریم حدودلریده اوج آلگنی اوچون همه ییرده بیردیک امنیتگه تیگیشلی مشکللرنی برطرف ایتیش امکانلری و قابلیتیگه ایگه بولمهگن لیکلرینی اعتراف ایته دیلر. طبیعی که بوندهی دلیللر بیلن مملکت خوفسیزلیگ ارگانلری ملازملری مسوولیتی کمهیمهیدی.
اولر افغانستان نینگ هر بیر قریچ ییرینینگ امنیتی تأمینلش اوچون جوابگر حسابلنهدیلر. مذکور ارگانلر رهبریتی همده افغانستان جمهور رییسی افغانستان شمالیده وضعیتنی یخشی لش اوچون اساسی چارهلر کوریش لیککه مجبور. عکس حالده شمالی ولایتلر امنیتی بوندن – ده یامانلشگن حالده مملکت دولت حاکمیتی کوتیلمهگن تهدیدلرگه دوچ کیلهدی.
شو کیچه کونلرده شمال ولایتلری امنیتینی امکان قدر تیکلش اوچون دولت نینگ تیگیشلی ارگانلری جدی سیناو بیلن روبه رو بولماقدهلر. در واقع مملکتدهگی ایریم سیاسی و امنیتی قیینچیلیکلرنی یینگیش دولت رهبریتیدن سیاسی جوهر و قابلیت طلب قیلهدی.
