مسکوده طالبان گروهینینگ نمایندهلری بیلن اوچرهشگن روسیهلیک بیر ییریک دیپلماتنینگ ایتیشیچه، افغانستاندن آمریکا کوچلری چیقیشیدن روسیه حمایت قیلهدی. اسوشیتد پرس خبری آژانسینینگ گزارش بیریشیچه، بو اوچرهشوو افغانستان سیاسی سیمالری و طالبان گروهی آرهسیده یولگه قوییلگن مسکو تینچلیک ییغینی چیکهسیده عملگه آشیریلگن.
اسوشیتد پرس گزارشیده کیلیشیچه، افغانستان بوییچه روسیه نمایندهسی ضمیر کابلوف نینگ ایتیشیچه، مسکو افغانستاندن آمریکا کوچلری چیقیشی خصوصیده، آمریکا و طالبان گروهی آرهسیده میانجیگرلیک قیلیش گه یاردم بیریش اوچون حاضر دیر.
اوشبو بیاناتلر بیان ایتیلگن بیرچاغده، مسکو تینچلیک ییغینیده طالبان گروهی هیأتینینگ اعضالریدن بیری، افغانستاندن آمریکا کوچلرینی یریمی چیقیشی اوستیگه آمریکا و طالبان گروهی کیلیشگنیدن خبر بیرگن؛ بو خبر آمریکانینگ نمایندهسی زلمی خلیلزاد تامانیدن رد ایتیلگن.
مسکو تینچلیک ییغینی اوتگن هفته افغانستان حکومتینینگ غیابیده یولگه قوییلدی؛ بو ییغینده افغانستان سیاسی سیمالریدن بیرقطاری، جملهدن حامد کرزی، یونس قانونی و عطامحمد نور اشتراک قیلگنلر.
بو ییغین بیر شرطنامه صادر ایتیلیب یکونلندی. افغانستان حکومتی یولگه قوییلگن ییغین تینچلیک سوزلشوولری اوستیگه ایجابی تأثیر قویمهسینی بیلدیردی.
