بوگون (دوشنبه) ناتونینگ اصلی مرکزی بروکسلده خبری انجمنده چیقیش قیلگن ناتونینگ باش کاتبی ینس ستولتنبرگ، افغانستان مسالهسی بو تشکیلات اوچون هنوز هم مهم بیر موضوع دیگن.
افغانستان حکومتیگه ناتو همده دنیا جماعهچیلیگی نینگ کومکلری دواملی ایکنلیگی توغریسیده خوشبنلیک بیلدیرگن ینس، کیلگوسی ییلده ناتو رهبرلرینینگ امریکه ینگی جمهور رییسی اشتراکیده اوتکزیله دیگن ییغینده افغانستان مسالهسی اوستیده هم بحث بولیشی ممکن دیگن.
جناب ستولتنبرگ، اوشبو ییغینده ناتو تشکیلاتی امریکا دولتیدن افغانستانگه کورستهجک همکارلیگیگه دوام بیریشنی سورهیدی دیگن.
افغانستان ملی کوچلری اخیرگی وقتلرده لازم قابلیتگه ایگه بولیب، ترورچی گروهلر بیلن یوزمه – یوز اوروش آلیب باریش قابلیتیگه ایگه بولگن لیکلری اوستیده علیحده تاکید قیلگن جناب ستولتنبرگ.
شونینگدیک افغانستان حربی کوچلری مسوولیتنی موفقیتلی شکلده آلغه آلیب باریشی خصوصیده هم اشاره قیلگن ناتو باش کاتبی.
ناتونینگ باش کاتبی، قوراللی طالبلر و باشقه ترورچی حرکتلر نابرقرارلیک همده زوروانلیک حاللرینی آشیریش اوچون کوپراق سعی و حرکت آلیب بارگنلر؛ بیراق بو تشکیلات ترورچی گروهلر نابود بولگونچه افغانستان یانیده توریب بو مملکتگه همکارلیگی حقیده ینه بیر مرته اورغولهگن. شو کبی ناتو باشقه فعالیتلری یانیده افغان ملی کوچلرینی حربی ساحهده تربیهلشگه همان دوام بیرهدی دیگن جناب ینس.
بوندن آلدین ناتو نینگ ییغینی اکتوبر آیی نینگ 4- 5- کونلریده بروکسلده اوتکزیلگن ایدی. مذکور ییغینده افغانستان حکومتی تورت ییلگه قدر ناتوگه اعضا مملکتلرنینگ چمهسی 15 میلیار اقش دالری مقداریدهگی یاردمینی جلب قیلیشگه موفق بولگندی.
