د افغانستان ټاکنیزو شکایتونو د څېړنې کمېسیون وايي، حکومت د راتلونکو ټاکنو د ترسره کولو لهپاره جدي اراده نهلري.
د یاد کمېسیون مشر عبدالعزیز اریایي د چهارشنبې (می ۲۴مه) د یوې خبري ناستې په ترڅ کې وویل، چې د ولسي جرګې او ولایتي شوراګانو راتلونکو ټاکنو بهیر پڅ روان دی او خبرداری يې ورکړ، چې دغه بېپروایي هیواد له کړکیچ سره مخ کوي.
د شکایتونو کمیسیون مشر پروینا، د هیواد وضعیت، د حکومت او د ټاکنو خپلواک کمیسیون کار کړنو په اړه د دوی موندنې ښیي چې راتلونکې ټاکنې پر ټاکلي وخت نهشي ترسره کېدی.
اریایي زیاته کړه، چې د حکومت او ټاکنو خپلواک کمیسیون د ټاکنیزې طرحې په اړه همغږي نه لري، نو ځکه خو د راتلونکو ټاکنو بهیر ټکنی شوی دی.
دی وايي، چې د ټاکنو کمېسیون او حکومت ترمنځ ډیره کمه فاصله ده، خو پر وینا يې دوی له تېرو درېيو میاشتو راهیسې خبرې نه دي کړي.
په دې اړه مو وغوښتل د ټاکنو خپلواک کمېسیون نظر هم ولرو، خو د پرلهپسې هڅو سره ـ سره بریالي نهشو.
له بل لوري بیا، د ولسمشر ځای ناستي ویاند شاه حسین مرتضوي د حکومت او د ټاکنو خپلواک کمیسیون ترمنځ نه همغږي ردوي او وايي، چې حکومت د تیرکال په کب میاشت کې د ټاکنو خپلواک کمیسیون او د ټاکنو مالي ملاتړو سره لس ځله غونډې کړي دي.
«هغه څه چې پر حکومت پورې اړه لري، د ټاکنو له پاره د مالي سرچینو برابرول او د امنیت ټینګښت دي چې په دواړو برخو کې حکومت خپل کار کړی، د مالیې وزیر د مالي سرچینو په اړه کار کوي او همدغه راز، د کورنیو چارو وزیر د امنیت ټینګښت له پاره هاند او هڅه کوي، د کار یوه برخه خپله د ټاکنو خپلواک کمیسیون مسوولیت دی.»
له دې سره ـ سره لا هم څرګنده نه ده، چې د ولسي جرګې او ولسوالیو شوراګانو ټاکنې به سږکال ترسره شي، خو تردې مخکې حکومت او د ټاکنو خپلواک کمیسیون څو ځله، په روان کال کې د ټاکنو په ترسره کېدو ټینګار کړی.
