یو شمېر وکیلان پر افغانحکومت نیوکه کوي، چې د سرپرست وزیرانو د کار دوام په دغو وزارتونو کې د فساد زیاتېدو ته زمینه برابره کړې ده.
دوی وايي، چې اوسمهال د ۹ وزارتونو وزیران ځایناستي یا د سرپرستانو په توګه د څه باندې پنځوو میاشتو راهیسې کار کوي، خو پر وینا يې حکومت تر اوسه د دوی پر ځای نوي نوماندوزیران ولسي جرګې ته د اعتماد رای اخیستو په موخه نهدي پېژندلي.
د ولسي جرګې یو شمیر غړي په دغو وزارتونو کې د ځایناستو د کار دوام د سرپرستۍ قانون خلاف بولي.
د ولسي جرګې غړې فوزیه کوفي پر حکومت د نیوکې سره وایي، چې ۹ وزارتونه ځای ناسي اداره کوي، فساد او بې مسوولیتي زیاته شوې.
د کوفي پر وینا، د کانونو او پترولیم وزارت له نږدې یوه کال راهیسې ځایناستی اداره کوي؛ خو حکومت تراوسه هیڅ نوماند وزیر دغه وزارت ته نهدی ورپیژندلی.
د ولسي جرګې بل غړی غلام فاروق مجروح هم له حکومته غواړي، چې د باور رایو ترلاسه کولو په موخه نوماند وزیران ولسي جرګې ته وروپیژني.
مجروح وایي، ځایي ناستي او بېواکه شوي وزیران نه پریږدي، چې د ملي شورا کار پرانیستنې مراسمو کې ګډون وکړی.
خو د ولسمشر مرستیال ویاند دواخان مینهپال وایي، د هغو اوو وزیرانو برخلک په اړه چې ولسي جرګې بېواکه کړي د سترې محکمې تفسیر ته سترګې پرلار دي؛ خو هغو وزارتونو ته به ډیر ژر نوي نوماند وزیران وروپیژندل شي چې ځای ناستي یې اداره کوي.
خو سترې محکمې د ولسي جرګې له لوري د کابینې ۷ وزیرانو بېواکه کیدو لامل د مقننه او اجرایه قوې ترمنځ کړکیچ زیږنده بللي او ویلي یې دي، چې دا مسئله سترې محکمې پورې اړه نهلري.
ولسي جرګې پنځه میاشتې مخکې د کابینې ۱۷ وزیران چې له ۷۰٪ لږ پراختیایي بودیجه یې لګولې وه استیضاح کړل، چې په پایله کې یې ۷ وزیران بې واکه شول.
حکومت د ولسي جرګې له دې پریکړې سره مخالفت او په دې اړه یې د سترې محکمې نظر په غوښتلو سره اعلان وکړ، چې د سترې محکمې نظر تر روښانیدو پورې بېواکه شوي وزیران کار ته دوام ورکوي.
