.jpg)
ملي یووالي حکومت د محمد ظاهر اغبر په مشرۍ د المپیک ملي کمېټې ته بودیجه ورنهکړه؛ ترڅو د اسلامي هېوادونو په سیالیو کې ګډون وکړي.
د محمد ظاهر اغبر په مشرۍ د المپيک ملي کمیټې د یوې خبرپاڼې په خپرولو سره ویلي، د ولسمشر او اجرایوي رییس په شمول له ټولو مسوولو چارواکو سره د خبرو سره، سره د سفر لهپاره تراوسه بودیجه نه ده ورکړل شوې.
د اغبر په مشرۍ د المپیک کمېټې د رسنیو څانګې مسوول منورشاه شهزاد سلام وطندار سره په خبرو کې وویل، دوی به له خپلو کمو امکاناتو په استفادې د ازربایجان په کوربتوب د اسلامي هېوادونو سیالیو کې د ګډون په موخه د ټولو لوبغاړو لهپاره وېزې واخلي.
د المپیک ملي کمېټې د خبرپاڼي له مخې، د بودیجې نهشتون په دې سیالیو کې د افغانستان په ګډون منفي تاثیر کوي او دوی مجبوره دي؛ تر څو د غوره شوي زیات شمېر لوبغاړو په ځای یوازې کم شمېر لوبغاړي دغو سیالیو ته ورولېږي.
د المپیک ملي کمېټې دغه چارواکي زیاته کړه، دوی نه پوهېږي، چې په کوم اساس مالیې وزارت بودیجه نه ورکوي.
.jpg)
د نوموړي پروینا، په همدې موخه یې یادو سیالیو ته د ۱۳ ورزشي رشتو څه باندې ۹۰ لوبغاړو سبا په کابل کی یوه رسنیزه غونډه هم راغوښتي د حکومت د بېغورۍ له کبله خپلې اندېښنې شریکې کړي.
په افغانستان کې اوسمهال دوه سری المپیک ملي کمېټه فعالیت کوي، چې یو یې د ارګ او بله یې د اجرایوي ریاست ملاتړ له ځان سره لري.
دغه راز د محمود حنیف په مشرۍ د المپیک ملي کمېټې کلنۍ بودیجه په اختیار کې لري؛ خو د ظاهر اغبر په مشرۍ د المپیک ملي کمېټه بیا له نړیوالې المپیک شورا سره رسميت لري.
ټاکل شوې د اسلامي هېوادونو څلورم پړاو سیالۍ د روانی مې میاشتې په ۱۲ نېټه د ۱۱ ورځو لهپاره د افغانستان په شمول د ۵۶ اسلامي هېوادونو د لوبغاړو ترمنځ په بېلابېلو ورزشي رشتو کې د ازربایجان په پلازمینه باکو ښار کې پیل شي.
د اسلامي هېوادونو سیالۍ هر څلور کاله وروسته په یو غړي اسلامي هېواد کی ترسره کېږي، چې تېر ځل په اندونیزیا کې ترسره شوې.
