پر ټاکنو څارونکي بنسټونه وایي، افغان حکومت په داسې حال کې د بروکسل په غونډه کې ګډون کوي، چې خپلې ژمنې یې عملي کړي نه دي او د ټاکنو په نظام کې هغه اصلاحات چې خلک او نړیواله ټولنه یې غوښتنه کوي، نه دي راوړي.
د ټاکنو د څارونکو بنسټونو مسوولین وايي، د ولسمشر له خوا د ټاکنو په نظام کې د اصلاح په پار د څوو فرمانونو صادرول او د ټاکنیز نظام سمون ځانګړي کمېسیون جوړول "وخت ضایع" کول وو او د ټاکنیز نظام د سمون له پاره هېڅ اساسي کار نه دی شوی.
د مدني ټولنو د بنسټونو (اکسین شبکې) غړی جانداد سپین غر سلام وطندار ته وویل، افغان حکومت په کړو ژمنو عمل نه دی کړی او هغه ګامونه چې دولت پورته کړي د خلکو او نړیوالې ټولنې له غوښتنو سره برابر نه دي.
سپین غر زیاتوي، نړیواله ټولنه د بورکسل په غونډه کې اړه ده، چې د حکومت کاري ظرفیت په نظر کې نه نیول او د ژمنو نه عملي کولو سره سره د افغانستان خلکو سره لازمې مرستې وکړي.
له بلې خوا د ازادو ټاکنو بنسټ یا فیفا غړی حسیب معترف سلام وطندار ته وویل، چې حکومت د بروکسل په غونډه کې د ګډون په پار لاسته راوړنې نه لري؛ هغه سمونونه چې خلک او نړیواله ټولنه یې غوښتونکي دي، په اړه پاتې راغلي دي.
خو د ولسمشر د ویاند مرستیال شاه حسین مرتضوي سلام وطندار ته وویل، چې د ټاکنو د کمېټې په کار پیلول د ملي یووالي حکومت له لاسته راوړنو دي او وایي، د بروکسل د ناستې له پاره ډېرې ژمنې عملي شوي او حکومت د بروکسل په غونډه کې د ګډون پوره چمتووالی لري.
په ټاکنیز نظام کې سمون راوستل، اقتصادي پرمختګ، د اداري فساد مخنیوی، ښه حکومتولي، د ښځو د اقتصاد پیاوړتیا او د ماشومانو حقونه د بروکسل په غونډه کې د ملي یووالي حکومت له ژمنو څخه دي.
