وروسته له هغه چې د عطا محمد نور لېرې کولو په اړه د ارګ او جمعیت ترمنځ اختلاف رامنځته شو او د دغه ګوند مشرتابه له حکومته د خپلې ونډې غوښتنه وکړه؛ د حزب اسلامي مشر وویل، اېتلافي حکومت او د قومونو ترمنځ د واک وېش د هېواد د تجزیې سبب ګرځي.
ښاغلي حکمتیار نن په کابل کې خبري غونډې ته وینا کوله، ويې ویل، چې اېتلافي حکومتونه په هېڅ ځای کې بریالي نه وو.
د حزب اسلامي مشر د یو غیراېتلافي حکومت په جوړولو ټینګار کوي او وايي چې ولسمشر باید د رڼو او له درغلیو پاکو ټاکنو پر بنسټ وټاکل شي.
ښاغلي حکمتیار د عطا محمد لېرې کولو په اړه وروستیو لانجو ته په اشارې سره وویل، چې ورته شان اختلافونه د حکومت کمزورۍ سبب کېږي او دوی د یو پیاوړي حکومت غوښتونکي دي.
حکمتیار د دغو اختلافونو پر حل ټینګار او زیاته یې کړه، ورته شان اختلافونه په هېواد کې د جګړې دوام سبب ګرځي چې ګټه يې یوازې د افغانستان دوښمنانو ته رسیږي.
د دغو اختلافونو هوارولو په موخه د ارګ او جمعیت اسلامي ترمنځ لومړنۍ خبرې دوه ورځې مخکې په کابل کې پیل شوې، چې د ارګ په استازیتوب محمد حنیف اتمر، معصوم ستانکزي او سلام رحیمي او دغه راز د جمعیت په استازيتوب صلاحالدین رباني، محیالدین مهدي، ستار مراد او واقف حکیمي په کې ګډون کړی و.
