د لوګر والي محمد حلیم فدايي وايي، چې د وروستیو ناامنیو له امله د دغه ولایت په مرکز پل علم، بره کي برک، خوښۍ او څرخ ولسوالیو کې د نجونو ۲۵ ښوونځي او درې مدرسې تړل شوي دي.
فدايي سلام وطندار سره د مرکې پر مهال وویل، د لوګر د پوهنې مسولینو ورته د نجونو ښوونځیو تړل کېدو په اړه ویلي دي، چې وسله والو طالبانو خبرداری ورکړی، که د نجونو پر مخ د ښوونې او روزنې دروازې و نه تړل شي ښوونځي به وسوزوي.
فدایي د مرکې پر مهال زیات کړه، چې په دې اړه یې د لوګر ولایتي اداره، ولایتي شورا، عالمانو شورا او مدني ټولنې په ګډه سره کار کوي او د نجونو تړل شوي ښوونځي به بېرته پرانیزي.
والي وویل، چې ښوونځیو ته د وسله والو طالبانو له ګواښ سر بېره په ځېنو سیمو کې د ناوړه دودونو له مخې ځېنې کورنۍ خپلې لوڼې له اووم ټولګي پورته زده کړو ته نه پرېږدي.
د دغه ولایت د ښځو چارو ریاست هم مني، چې په بره کي برک، خوښۍ او څرخ ولسوالیو کې د نجونو لسګونه ښوونځي تړل شوي دي.
د ښځو چارو رییسې شیما زرګر سلام وطندار ته وویل، له بېلا بېلو سیمو څخه لسګونه ښځنیه ښوونکو ورته شکایت کړي، چې وسله والو طالبانو د پرله پسې ګواښونو له امله ښوونځي تړلي شول دي.
هغې زیاته کړه، چې په دې اړه د لوګر ولایتي اداره خبره ده او د خلاصون هڅې هم پيل شوي دي.
د ورستیو راپورنو له مخې په مرکز پل علم کې تېره میاشت هم وسله والو د غلام نبي سمسور او حاجې ګلون په نوم د نجونو دوه ښوونځي سوزولي وو.
د لوګر امنیې قوماندان مل پاسوال محمد داود احمدي سلام وطندارته وویل، د دغه ولایت ټولو امنیه قوماندانانو ته یې امر کړی، چې په ټولو کلیو او بانډو کې د نجونو د ښوونځيو په پرانیستلو کې هڅې وکړي او د نجونو ښوونځيو او ښځینه ښوونکو او زده کوونکو امنیت خوندي کړي.
احمدي زیاته کړه، چې اوسمهال د لوګر په ناامنه سیمو کې پراخ عملیات روان دي او ژر به په دغه ولایت کې د نجونو تړل شوي ښوونځي به پرانېستل شي.
افغان ولسمشر محمداشرف غني لوګر ولایت ته د تېرې اونۍ سفر په ترڅ کې د دغه ولایت ښځینه وو ته ډاډ ورکړ، چې د زده کړو او کار زمینه به ورته برابره کړي او د دوی ټولې ستونزې به حل کړي.
لوګر کې له تېرو ۱۴ کالونو راهیسې په ازرې او خروار ولسوالیو کې د نجونو ښوونځي نه دي پرانېستل شوي.
