د حقيقت موندنې کمېسيون غړو د يوې خبري ناستې په ترڅ کې وویل، چې د دوی څو ورځنیو څيړنو او تحقيقاتو څخه وروسته دا جوته شوه، چې د قهرېدلو خلکو له لوري د فرخندې وژنه هيڅ اساس نه درلود او دغه نجلۍ په بشپړه توګه بېګناه وژل شوې.
د دغه کمېسيون مشر محي الدين بلوچ زياته کړه، چې د فرخندې په قضیه کې باید د افغانستان ټول د دین عالمان، د مدني ټولنو غړي او عام خلک په علني توګه په يو غږ سره دغه قتل په شديدو ټکو وغندي.
بلوچ دا هم وویل، چې فرخنده شاوخوا ۲۵ دقيقې د خلکو له لوري وهل ټکول شوې ده.
د دغه کمېسيون غړې فوزيه کوفي زياته کړه، چې عدلي او قضايي ارګانونه باید دغه موضوع په جدي ډول وڅېړي او د خپلو فیصلو په باب خلکو ته پوره وضاحت ورکړي.
دا وايي په دغه قضيه کې عدلي او قضايي ارګانونه هيڅ ځنډ نه شي کولای، ځکه ټول عام ولس د دغې قضيې نظاره ګر دي.
همدارنګه د راپورونو له مخې د افغانستان د امنيت شورا هم پريکړه کړې، چې د شاه دوشمشېره واټ باید د فرخندې په نوم و نومول شي؛ هغه څه چې له دې وړاندې د مدني ټولنو له لوري پر دغه واټ د نوموړې له وژلو وروسته د لاريون په پایله کې وشوه.
د جمهور رییس دویم مرستیال سرور دانش تېره ورځ د کابينې د پاتې وزيرانو د پېژندنې پر مهال ولسي جرګې ته وویل، چې افغان حکومتي چارواکي د فرخندې د وژنې د پېښې له امله شرمسار او شرمنده ده.
نوموړي تېره چهارشنبه (۲۰۱۵ م زيږديز کال د اپريل ۱) د ولسي جرګې غړو ته د فرخندې وژنه نه بښونکی عمل یاد کړ او زیاته یې کړه، چې دولت به په راتلونکي کې داسې پېښو ته د تکرار اجازه ور نه کړي.
۲۷کلنه فرخنده د تېرکال د کب میاشتې په ۲۸مه نېټه د قهرېدلو خلکو له خوا د قرانکریم سوځولو په تور د وهلو او ټکولو په پاېله کې ووژل شوه او مړي ته يې اور ورته شو.
د پېښې له ځایه ثبت شوي وېډیو ګانې ښيي، چې پولیس د پېښې په ځای کې موجود دي او د دې جنایت ننداره کوي.
د امنیتي ځواکونو دغه ډول کړنې د خلکو جدي غبرګونونه راوپارول.
وروسته له دې پېښې د کورنیو چارو وزارت اعلان وکړ، چې د فرخندې د وژنې په تړاو ۱۹ امنیتي کسان ونیول شول.
د جمهورییس دویم مریستیال وايي، ټولو هغو امنیتي چارواکو سره به، چې د فرخندې د وژنې په پېښه کې یې بې پروايي کړې قانون چلند وکړي.
