د کندوز یوشمېر بزګر او کروندګر وايي چې نامسووله وسلهوال د دغه ولایت په مرکز او ولسوالیو کې د امنیت ټینګښت په پلمه له خلکو عشر ټولوي.
د کندوز یوه بزګر سلاموطندار ته ویلي چې سږ کال یې د پنځه جریبه ځمکې ۳۰۰ منه غنم اخیستي، خو وسلهوالو ترې ۱۰۰ منه د عشر په نوم اخیستي دي. هغه وايي، خلک هغوی ته تر تسلیمېدو پرته بله لار نه لري.
د کندوز بزګران وايي، وسلهوال کسان د غنمو، خټکیو او هنډوانو د حاصلاتو ټولولو په موسم کې پیدا کېږي او کروندګر ځوروي.
د کندوز بزګران له حکومته غواړي چې د یادو وسلهوالو مخه ونیسي.
د کندوز د کرنې رییس عبدالهادي قرلق د نامسووله وسلهوالو له لوري د عشر ټول تاییدوي او وايي چې یاده موضوع یې له امنیتي ادارو سره شریکه کړې ده.
د کندوز محلي مسوولان وايي، په وروستیو دوو کلونو کې له ۷۰ نه ډېر وسلهوال د خلکو د ځورولو په تور د امنیتي ځواکونو له لوري نیول شوي او دا لړۍ روانه ده.
د کندوز د والي ویاند عصمتالله مرادي وايي، د کندوز محلي حکومت د هغو کسانو مخه نیسي چې له خلکو عشر ټولوي.
دا لومړی ځل نه دی چې وسلهوال کسان د کندوز له کروندګرو عشر ټولوي. د خلکو په وینا، نږدې یوه لسیزه کېږي چې حکومت نه دی توانېدلی د یادو کسانو مخه ونیسي.
