اخیرگی کونلرده‌گی نابرقرارلیک پایتخت کابل شامل بعضی بیر ولایتلرده اونلب یشاوچی تحصن چادری تیکلش‌گه قول اوردیلر. بو اعتراضلر مملکت‌ده چیکله‌نیب قالمه‌ی بلکه کانادانینگ تورنتوی و لندن نینگ بریتانیا شهرلریده هم تحصن چادر تیکلندی. مملکت ایچکریسی‌ده سیاسی حزبلرنینگ بعضیسی جمهور رییسلیک سرایی و بعضیسی ایسه اعتراضچیلردن حمایت قیلدی.
حزب اسلامی افغانستان دین عالملر کینگشی جمهور رییسلیک سرایینی حمایت قیلیب خبری انجمن اوتکزدی و جمعیت اسلامی، حزب جنبش و ملی نوین جبهه‌سی اعتراضچیلرنی دستکله‌دی.
بو بولینیشلر فضانی هر زماندن کوره کوپراق ایکّی و نیچه بولینیشلریگه سبب بولدی. تحلیلچیلرگه کوره، افغانستانلیک سیاسی وجهادی حزبلردن یخشی خاطره‌لری یوق و حزبلرنی بیر – بیری مقابلی‌ده توخته‌شی قومی ضدیتلرگه کوپراق توس بیرگن.
سیاسی تحلیلچی اسحاق اتمر، حاضرگی کونده سیاسی جریانلر بیر- بیراوی نینگ مقابیلیده توخته‌شی افغانستان فایده‌سیگه ایمس دیگن. تامان واقع بولیشلر بحران وجودگه کیلتیره‌دی «بحران ایسه قان توکیش» دیدی جناب اتمر. بحرانگه روپه ره بولگن مملکتلرده حزبلر ملی منفعتلر اوچون بیر – بیراوی یانیده توره‌دی و هلیگی شرایطده هم مملکت‌نی هم شونده‌ی بیر بیرلیککه احتیاجی بار دیدی.
باشقه بیر سیاسی تحلیلچی امین حیدری، حزبلرنی بیر – بیراویگه مقابل توریشی افغانستان بحرانی کوچ آلیشی‌گه باعث بوله‌دی دیگن. او، توقنشوو تامانلر بحران آلدی آلینیشی اوچون بیر قول بولیشلرینی تکلیف قیلگن.
بیلیم یورت استادی علی امرینی نینگ فکری باشقچه. بونده‌ی تارتیشوولر و طرف واقع بولیشلر حاضرگی شرایطده عادی و معمولی بیر گپ دیر. امری‌نینگ تعبریچه، حزبلر دایم بیر- بیراوگه ضد بولیب کیلگن. اما بو ضدیتلر حاضرگی وضعیت اوچون قیینچلیک توغدیرمه‌یدی.
