افغانستان بوییچه یرهش عالی کینگشی نینگ تینچلیک سوزلشوولری خصوصیده بولگن بیرینچی رهبرلیک ییغینی اوتگن کون یولگه قوییلدی؛ بیراق بو کینگش تشکیل ایتیلیشی و ییغین یولگه قوییلیشی گه قدر یوز بیرگن موضوع پرده آرتیده قالگن.
شوندهی بیرحالده، سلاموطندارگه صحبت بیرگن ایشانچلی بیر منبع نینگ ایتیشیچه، یرهش عالی کینگشی نینگ تشکیل ایتیلیش ماجراسی جوده هم جنجللی بولگن. منبع گه کوره، اوشبو کینگش تشکیلینی یریمی دن آرتیغی جمهور رئیس غنی شامل 17 کیشی خاص بیر قوم گه تیگیشلی بولگن.
منبع گه کوره، یرهش کینگشی نینگ بیرینچی ییغینیده، اوشبو رویخط اشتراکچیلرنینگ جدی عکسالعملی گه روپهره بولگن و ییغین اعضالری رویخط اصلاح قیلینیشی نی سورهگن.
بو ییغینده «حنیف اتمر و امرالله صالح» شامل 13 کیشی رویخطدن چیقاریلگن و بو موضوع مذکور ایکی کیشی نینگ بیراوینی قتیق عکسالعملی گه دوچ کیلگن؛ شوندهی بیرحالده، اوتگن کون تینچلیک و اعتدال سیلاو تیمی نی رهبری محمدحنیف اتمر، بیر خبرنامه ترقهتیب بو کینگش نی سفارشی دیگن ایدی.
مذکور تیم نی باشقه بیر خبرنامهسیده کیلیشیچه، ترقهتیلگن رویخطلرده ملیت-جنسیت ترکیبی رعایت قیلینمهگنی، سیاسی حزبلر و سیاسی جریانلرنینگ ملی و جهادی سیمالری و مدنی جماعهچیلیک ادارهلری نینگ حقیقی نمایندهلری رویخطلردن چیقاریلگنی گه قرهگنده، حکومت تینچلیک لایحهسیگه همکارلیک قیلمهیدی و شونینگدیک، اوروش یکونلنیشی و دایمی تینچلیک تأمینلنیشی خصوصیده مقابل تاماننی ایشانچسیزلیگی گه سبب بولهدی و بو موضوع تینچلیک لایحهسی مؤفقیتی گه جدی شکلده زیان ییتکیزهدی.
معلومات گه کوره، یرهش عالی کینگشی نینگ رویخطیده مدنی جماعهچیلیک نمایندهلری، خصوصی بولیم و یاشلر ننگرهارلیکلر ایکن و شو یوزهدن خانجان الکوزی دن باشقه کیشیلر اوزگرتیریلگن.
شونینگدیک، یرهش عالی کینگشی نینگ بیرینچی ییغینیده قرار قیلینیشیچه، جنرال دوستم نینگ آتی وقتینچهلیک شکلده رویخطگه کیریتیلیشی کیرهک و او، اشتراک قیلمهگن صورتده، اوغلی باتور دوستم کینگش گه شامل قیلینهدی.
اصلاحات کیریتیلگنیدن سونگ، ییغین ترکیبی گه 14 پشتون، 7 تاجیک، 5 هزاره، 3 اوزبیک و باشقه عرب، نورستانی و بلوچ قوملریدن بیر-بیر کیشی شامل بولگن و عین حالده، بو رویخط حاضرگچه نهایی بولمهگن.
یرهش عالی کینگشی نینگ بیرینچی ییغینیده تانیقلی سیمالردن سابق جمهور رئیس حامد کرزی، جهادی رهبرلردن عبدالرب رسول سیاف، محمد محقق و اسماعیل خان و قطار سیاستچیلر، دولتی ییریک رسمیلر، مدنی جماعهچیلیک نمایندهلری، دین عالملری و عیاللر اشتراک قیلگنلر.
یرهش عالی کینگشی جاری هفته چهارشنبه کونی طالبان گروهی بیلن تینچلیک سوزلشوولرینی آلغه آلیب بارهدیگن هیأت اعضالرینی تعیینلب و تنلش گه قرار قیلگن.
شو توغریده…
تینچلیک سوزلشوولری توغریسیده حکومت و طالبان توشونچهلری ماس کیلمهیدی
