د کاپیسا د طبعي پېښو پرمهال د چمتووالي ادارې رییس محمدامین حیدري سلاموطندار ته وايي، د نجراب ولسوالۍ افغانیه دره کې د ګډو امنیتي ځواکونو عملیاتو له پیل راهیسې تراوسه د دې سیمې له ۱۴ کلیو نه ۳۰۵ کورنۍ بېځایه شوېدي.
د ښاغلي حیدري په وینا، سره لهدې چې دغو بېځایه شویو د خپلوانو کورونو ته پناه وړې او ښه وضعیت کې ژوند کوي؛ خو د هغوی د څېړنو په پای ته رسېدلو سره به دغو کورنیو سره اړینې مرستې وشي.
د کاپیسا له تګاب ولسوالۍ وروسته، افغانیه دره سیمه د طالبانو له مهمو او ستراتیژیکو ساحو څخه شمېرل کېده چې د کاپیسا د امنیتي مسوولانو په وینا، امنیتي ځواکونه تېرو لسو کلونو کې دغې درې ته نهدي تللي.
د ۲۰۱ سېلاب قولاردو د درېیمې لوا قوماندان عبدالقادر روستايي وايي، دغو عملیاتو کې ۴۳ طالبان وژل شوي چې نږدې ۱۰ یې پهکې مهم قومندانان دي. دغه راز ۷ نور یې ټپي دي او پنځه یې ژوندي نیول شويدي.
د هغه په وینا، افغانیه دره کې تراوسه پورې ۲۷ کلي د طالبانو له موجودیته پاک شويدي.
د افغانیه درې یو شمېر اوسېدونکي چې څو کاله یې د طالبانو تر حاکمیت لاندې تېر کړي وايي چې ځېنې کسان به یې بې له کوم ثبوته له دولت سره په همکارۍ د سیاسي اشخاصو په شان تري تم کړل.
د سیمې اوسېدونکي د طالبانو له لوري له بېځایه عُشر او ذکات ټولولو نه هم تنګ وو.
په تېره یوه میاشت کې د کاپیسا ناامنو سیمو کې د ۲۰۱ سېلاب قولاردو له لوري د پوځي عملیاتو په لاره اچولو، د امنیت تامینولو او د طالبانو د څوو کلونو مرکزونو لهمنځه وړلو په برخه کې د سیمې اوسېدونکیو هیلې زیاتې کړېدي.
