د جوزجان په دولتي روغتون کې ځینو ډاکټرانو سلاموطندار ته ویلي چې د دغه روغتون د جراحي برخې متخصص داوود پویا عزیز بېګاه ماښام پر کورونا د اخته کېدو له امله ومړ.
د دوی په وینا، دغه ډاکټر ۲۰ ورځې وړاندې د کورونا د تشخیص معاینه کړې وه، خو پایله یې منفي ښودل شوې وه.
ډاکټر پویا په جوزجان کې د کورونا ناروغۍ لومړنی قرباني دی. ویل کېږي چې د دغه ډاکټر له مرګ وروسته، د دغه روغتون بېړنۍ څانګه کورنټین شوې ده.
د جوزجان د عامې روغتیا ریاست مسوولان په دې اړه څه نه وايي.
د پویا په ګډون تر اوسه په هېواد کې ۴ ډاکټران پر کورونا ویروس د اخته کېدو له کبله مړه شوي دي.
