د بغلان یو اوسېدونکی وايي، ورور یې چې پر کورونا ویروس اخته و، د دغه ولایت مرکزي روغتون نه تښتېدلی دی.
نوموړي د نوم د یادولو په شرط سلاموطندار ته ویلي چې ورور یې څه موده مخکې د ایران له «قم» نه راغلی و او وروسته بیا د کورونا نښتې پهکې پیدا شوې.
د دغه کس کورنۍ له پولیسو غوښتي چې هغه پیدا او د درملنې او نورو ته ترې د ویروس خپرېدو مخنیوي لپاره یې د ولایت یوه روغتون ته ولېږدوي.
کورونا ویروس یوازې په څو میاشتو کې نږدې ټولې نړۍ ته رسېدلی او د هرې ورځې په تېرېدو سره پرې د اخته کسانو شمېر زیاتېږي. تر اوسه دا ویروس له دوو سوو په ډېرو هېوادونو کې خپور شوی دی.
تر اوسه ۲۷۳ کسان په هېواد کې پر دغه ویروس اخته شوي چې ډېری یې په هرات ولایت کې دي. دغه راز ۶ کسان یې له کبله مړه شوي او ۱۰ نور بیا بېرته روغ شوي دي.
د عامې روغتیا وزارت له خلکو غوښتي چې د کورونا ویروس د خپرېدو مخنیوي لپاره په کورونو کې پاتې شي.
