د جاپان سفیر میتسوجي سوزوکا نن په کابل کې یوې خبري غونډې ته وویل چې بریالۍ ټاکنې یوازې د دولتي بنسټونو لکه د ټاکنو خپلواک کمېسیون یا د ټاکنیزو شکایتونو کمېسیون ښو کارکړنو پورې نه محدودېږي.
د ښاغلي سوزوکا په وینا، د بریالیو ټاکنو لهپاره باید ولس، مشران او سیاسي ګوندونه هر اړخیزه همکاري وکړي.
د جاپان سفیر زیاته کړه، هېواد یې د هغو ټاکنو ملاتړی دی چې ولس ته ښه او بریالۍ پایله ورکړي.
خبري غونډې ته دا فغانستان لهپاره د ملګرو ملتونو ځانګړي استازي تادامچي یاماماتو وویل، د جاپان مرسته ښیي چې نړۍواله ټولنه پر خپلو ژمنو ولاړه او عمل پرې کوي.
د ښاغلي یاماماتو په خبره، له ټاکنیزو بنسټونو سره د ظرفیتونو لوړولو په موخه جاپان څه د پاسه ۱۳.۱ میلیونه ډالرو مرسته کوي چې دا مرسته به د UNDP له لوري په سمه توګه ولګول شي.
په افغانستان کې د ملګرو ملتونو پراختیایي پروګرامونو د مرکزي دفتر مرستیال او ځایناستي ناپلیون ناوارو وویل چې دوی په افغانستان کې د رڼو، عادلانه او له درغلیو پاکو ټاکنو په موخه د افغان حکومت ترڅنګ ولاړ دي.
خو د ټاکنو خپلواک کمېسیون مشر عبدالبدیع صیاد خبري غونډې ته وویل چې د اپیسی باید د کمېسیون په همکارۍ او مشورې ولګول شي.
ښاغلي صیاد زیاته کړه، دوی د رڼو او بېدرغلیو ټاکنو ته ژمن دي او دغه کمېسیون د کومې ډلې تر فشار لاندې نه راځي.
جاپان له ۲۰۰۱ کال راهیسې له افغانستان سره د امنیت، کرنې، د کلیو بیارغاونې، د ظرفیتلوړونې، زدهکړو، روزنې او روغتیا په برخو کې میلیاردونه ډالر مرسته کړېده.
