د چکي رسنیو د خبر لهمخې، هېواد يې غواړي په افغانستان کې د سمنټو سترې فابریکې د جوړولو په موخه پانګونه وکړي.
د چک جمهوریت په پام کې لري، چې د هېواد په لویدیځ کې دغه ستره فابریکه جوړه کړي، چې ظرفیت به يې په ورځ کې ۱۶۰۰ ټنه تولید وي.
یاد هېواد په دغه برخه کې د ۷۰ میلیونو ډالرو د پانګونې ژمنه کړې، خو د دقیق ځای او ولایت په اړه يې څه نهدي ویل شوي.
د راپور پر بنسټ، د افغانحکومت او چک جمهوریت ترمنځ په دې اړه هوکړه به په ۲ میاشتو کې لاسلیک شي.
په پام کې ده، چې د چک حکومت د خپل خصوصي سکټور د پانګوالو له لوري له افغان طرف سره هوکړه وکړي.
څو موده وړاندې د حکومت لهخوا داسې راپور خپور شو، چې د سمنټو د تولید په برخه کې د پانګونې د هڅونې پر تګلارې کار روان دی.
په سکټور کې د پانګونې د هڅونې تګلاره د افغانستان د کانونو او پټرولیم وزارت له خوا چمتو شوې ده.
هغه مهال د کانونو او پټرولیم وزیر ډاکټر داوود شاه سبا و، چې د هغه له خوا د کابینې غونډې ته وړاندې شوې وه، چې تایید شوه.
د کانونو او پټرولیم وزارت چارواکي وايي، چې دغه پالیسي په افغانستان کې د سمنټو په برخه کې د پانګونې د جلبولو، د ودانیز سکتور لهپاره له کورنیو سرچینو څخه د لومړنیو موادو د برابرولو، د سیمنټو د صنعت د ودې، د مهارتونو د لېږد، له هېواده بهر د اسعارو د تېښتې د مخنیوي، خلکو ته د کارموندنې او د نورو مثبتو اقتصادي اغېزو په موخه جوړه شوې ده.
یاده دې وي، چې افغانستان هر کال د میلیونونو ډالرو په ارزښت ساختماني مواد او په ځانګړې توګه سمنټ له ګاونډیو هېوادونو په ځانګړي ډول پاکستان او ایران څخه واردوي.
د احصایې د مرکزي ادارې د معلوماتو پر بنسټ، درې کاله وړاندې افغانستان له بهره ټولټال څه باندې ۳ میلیونه او ۴۱ لکه ټنه سمنټ وارد کړي دي.
په ډاګه دې وي، چې دا یوازې د رسمي یا قانوني واردات دي او د هغو واردېدونکو سمنټو په اړه ارقام نهشته چې په غیر قانوني لارو هېواد ته قاچاق کېږي.
له بل لوري بیا، د افغانستان د سوداګرۍ خونې چارواکي وايي، پخوا افغانستان ته د ورځې په نورمال ډول له ۱۰ تر ۱۵ زرو ټنو پورې سمنټ واردېدل چې یوه برخه یې تاجکستان ته هم لېږدول کېده.
د لاسته راغلو معلوماتو لهمخې، د ۲۰۱۶ میلادي کال د جولای او د ۲۰۱۷ میلادي کال د فبرورۍ ترمنځ افغانستان له پاکستان څخه ۱۴۰۹ میلیون ټنه سمنټ وارد کړي دي.
