د کورنیو چارو وزیر تاج محمد جاهد وايي، که د دغه وزارت په چارو کې لاسوهنه و نه شي تر راتلونکو شپږو میاشتو به په هیواد کې امنیت تامین شي.
نوموړی، چې په هیواد کې د امنیتي وضعیت په تړاو مشرانو جرګې ته ورغوښتل شوی و زیاته کړه، که د پولیسو لیکو ته په جلب او جذب کې سلیقوي چلند ونه شي ډیر ژر امنیت ټینګیدای شي.
د کابل په پل محمود خان سیمه کې د تیرې سې شنبې ځان مرګی برید او د هیواد په یو شمیر سیمو کې د ناامنیو له زیاتېدو وروسته ، نن مشرانو جرګې امنیتي مسوولین د ځواب ویلو په موخه وربللي وو.
هغه په دغه وزارت کې د کسانو پر ګومارنو کلکله نیوکه وکړه او د امنیت ټینګښت په برخه کې يې ددغه ارګان په کار کې پاتي راتګ لامل د قومي او حکومتي مشرانو لاسوهنه وبلله.
جاهد زیاته کړه، چې پر دولتي پوستونو ګومارنو کې د حکومتي او قومي مشرانو لاسوهنه ستره ننګونه ده او د پولیسو ستونزې نورې هم زیاتوي.
هغه وویل: " زموږ پولیس د وړتیا، پوهې، تجربې، مسلک او کاري سابقې له مخې نه دي ټاکل شوي او ټول يې د اړیکو پر بنسټ ګومارل شوي، چې دا مسله د کورنیو چارو وزارت له سترو ستونزو ګڼل کیږي".
د کورنیو چارو وزیر پر وینا، د دښمن ډير پام د هیواد شمالي سیمو ته و، چې دغه ولایتونه تر خپلې ولکې لاندې راولي، خو پر خبره يې خپلې موخې ته ونه رسیدل.
د معلوماتو پر بنسټ اوسمهال د ترهګرو ځپلو په موخه په ۱۰ ولایتونو کې د امنیتي ځواکونو ګډ عملیات روان دي.
هغه زیاته کړه:" په ټوله کې د نوي کال له پیل راهیسې هغه تحرکات چې دښمن پیل کړي ۱۲۵۱ مورده و، د هیواد په بیلابیلو سیمو او شمال کې، ځانمرګه بریدونه، چادونې او بمب ایښودنې وې، تر اوسه پورې د دښمن له ۷۰۰ زیات کسان وژل شوي او نږدې ۵۰۰ نور ټپیان دي".
جاهد د امنیتي ځواکونو ترمنځ همغږۍ زیاتیدو په اړه وویل، چې دغه کار په جګړه کې د امنیتي ځواکونو د بریا لامل شوی دی.
د مشرانو جرګې نننۍ عمومي غونډې ته د ملي امنیت ځای ناستي عمومي رییس مسعود اندرابي هم وربلل شوی و، خو اندرابي د سناتورانو پوښتنې د تړلو دروازو ترشا ځواب کړې.
