افغانستان بشر حقلری ایرکین کمیسیون باشلیغی سیما سمرنینگ ایتیشیچه، افغانستان، پاکستان، چین و امیریکه تورت تامانلمه سوزلشوولریده، حکومت تامانیدن عیاللر حضوری کوزگه توتیلمهگن.
اوتگن (دوشنبه کون) کابلده تینچلیک توغریسیده اوتکزیلگن ایکی کونلیک ییغینده خانم سمرنینگ ایتیشیچه، عیاللر فکری نظرده آلینمهگن لایحه ناقص دیر.
تینچلیک تورت تامانلمه سوزلشوولری ایکینچی دوری، اوتگن (دوشنبه کون) کابلده اوتکزیلدی. اوشبو اولتیریشده افغانستان دولتی بیلن دولتگه قرشی برچه قوراللی گروهلر اورتهسیده دایمی تینچلیککه ییتیش ریجه اوستیگه بحث اوتکزیلگن.
شونینگدیک، خانم سمرنینگ ایتیشیچه، تینچلیک سوزلشوولریده، عدالت و اورش قربانلری نظرده آلینیشی کیرهک.
اوشبو ییغین اشتراکچیلرینینگ ایتیشیچه، افغانستان حکومتی تینچلیک تورت تامانلمه سوزلشوولریده، اوچ مملکت یانیده منطقه مملکتلرینی قوشیشی لازم ایدی.
بونگه قوشیمچه، بلخ ولایتی فعال عیاللریدن بیرقطاری، تینچلیک سوزلشوولریده عیاللر حضوری و رولی کوزگه توتیلمهگنی خصوصیده خواطر بیلدیریب و عیاللر حقیدن دفاع قیلووچی ادارهلردن تقنینی ادارهلر اوستیگه فشار کیلتیریب عیاللرگه قرشی زورهوانلیکنی باشقریش قانون تصدیقلنیشینی سورهگن.
بلخ فعال عیاللری، حکومتدن طالبلر ارا اوتکزیلهدیگن تینچلیک سوزلشوولریده عیاللر رولی و یوتوقلری خصوصیده، بی فرق یاندهش مسلیگینی ایستهگن.
بلخده تینچلیک ولایتی کمیته اعضاسی محبوبه ساداتنینگ ایتیشیچه، مملکت کته قرارلریده عیاللر رولی دایما نمایشی بولگن.
اولر، تینچلیک سوزلشوولریده عیاللر حضوری گه قرشی کته توسیقنی «عصیانچیلیک و وهابیت» دیب بیلهدی و دین عالملریدن جامعهده عیاللر حضوریگه قرشی فعالیتلرنی باشقریشینی سورهگن.
بلخ دین عالملریدن بیری سید محمد اسلامینینگ ایتیشیچه، عیاللر حضوری برابریدهگی قرشیلیکلرنی کوپینچهسی عصیانچی و وهابی تشکیلاتلر تامانیدن عملگه آشیریلهدی و بو تشکیلاتلر پاکستان و سعودی عربستان تامانیدن حمایه بولهدی.
