بوگون «شنبه» کابلده خبری بیر ییغینده افغانستان تنیق سیلاولر یا-ده تیفا ادارهسی سوزلاوچیسی صغرا سعادتنینگ ایتیشیچه، تومنلر کینگشی سیلاوی 28- میزان ده یولگه قوییلمهیدی.
خانم سعادت گه کوره، اولرنینگ قولگه کیریتگن معلوماتی تومنلر کینگشی سیلاوی یولگه قوییلیشی اوچون سیلاولر ایرکین کمیسیونینینگ تیارگرلیکلری جوده هم آز دیر و مملکتنینگ کوپینچه تومنلریده ییترلیچه نامزد یوق دیر.
شونینگدیک، سلاموطندارگه صحبت بیرگن سیلاولر ایرکین کمیسیونی سوزلاوچیسی عبدالعزیز ابراهیمینینگ ایتیشیچه، 120 تومنده عیال نامزد یوقلیگی و باشقه 40 تومنده ایرکک و عیال نامزد یوقلیگی مذکور کمیسیون اوچون قیینچیلیک یرهتگن.
ابراهیمی گه کوره، سیلاولر قانونینینگ 104- مادهسی اساسیده، اوشبو کمیسیون موضوع نی قانون ده بیلگیلنگن کمیته گه ییتکیزگن و اونگه اساس، تومنلر کینگشی سیلاوی وقتیده یولگه قوییلیشی یا-ده کیین گه قالیشی توغریسیده قرار قیلینهدی.
تیفا مسؤوللرینینگ کوپهیتیریشیچه، بیر ییل آلدین سیلاولر ایرکین کمیسیونی گه سیاسی حزبلر تامانیدن بیریلگن ریجه گه دقت قیلینمهگن و شونینگدیک، آواز بیرووچیلرنینگ رویخطگه آلیش جریانی بایومتریک سیستمی آرقهلی بولیشی توغریسیده سیاسی حزبلرنینگ ینگی ریجهسی زمان نیازی گه ماس کیلمهیدی.
اوشبو اداره، حکومت، سیلاولر ایرکین کمیسیونی، سیاسی حزبلر و دنیا جماعهچیلیگیدن بو ادارهنینگ تکلیفلرینی جدی آلیب و سیلاولر توغریسیده مسؤولیتلرینی عملگه آشیریشینی سورهیدی.
تیفانینگ تکلیفی گه کوره، سیلاولر ایرکین کمیسیونی ییغینلر و قرارلرینی آچیق شکلده آلیب، نظارت قیلووچی ادارهلر اوچون معلومات گه قول تاپیشنی قیسقرتمهی و ییترلیچه معلوماتنی اولرنینگ اختیاری گه بیریشی کیرهک.
