افغانستان نینگ شمالی ولایتلریدن جوزجان نینگ قرقین تومنیده طالبانگه قرشی فعالیت آلیب باره دیگن محلی یریم رسمی پلیتسیه نینگ تورکمن قوماندانلریدن غوربان دوردی بلخ ولایتی نینگ اوزبیکستان بیلن چیگره داش تومنی شور تیپهده اسلامی دولت جنگریلری موجولیگینی ادعا قیلدی. او مذکور جنگریلرنی اوزبیکستان تامانیگه تهدید اوتکزیش کوچیگه ایگه بولمهگنینی ایتهدی.
"بیز هلی اسلامی دولت جنگریلریگه قرشی جنگ قیلمهدیک. چونکه اولر بیزنینگ قره ماغیمیزده بولگن حدود ده هلی پیدا بولمهگن. اوشبو جنگریلر بلخ ولایتی نینگ قوشنی اوزبیکستان بیلن چیگره داش شور تیپه تومنیده فعالیت آلیب باره دیلر. اولر افغانستان دولتی خوفسیزلیک کوچلریگه قرشی جنگ قیله دیلر. شور تیپهدهگی اسلامی دولتگه وفادار عصیانچی گروهلر اوزبیکستانگه تهدید کوچیگه ایگه ایمس."
بوندن چمهسی بیر آی آلدین شور تیپه تومنینی جنگریلردن تازهلش مقصدیده بلخ ولایتی حاکمی عطامحمد نور تامانیدن بیواسطه باشقریلگن بیر کونلیک حربی عملیات نتیجهسیده بیر نیچه کیشی جنگریلر قولگه آلینگنی بارهسیده خبر بیریلگن ایدی.
محلی اهالیگه قره گنده افغانستان نینگ اوزبیکستان بیلن چیگره داش حدودلری توله لیگیچه دولت تامانیدن نظارت ایتیلمهیدی. کلدار و شور تیپه تومنلریده انچه دن بیری اکسریمست گروهلر جملهدن طالبانگه وفادار جنگریلر فعالیت آلیب باره دیلر.
عین حالده محلی رسمیلر شمالی جوزجان ولایتی نینگ درزاب تومنیده اسلامی دولت جنگریلری فعالیتی میزانی آشگنینی تاکیدلیدیلر. جوزجان ولایتی حاکمی سوزچیسی محمد رضا غفوری سهشنبه کونی درزاب تومنی محلی رسمیلرینی آق کمر قیشلاغیده اسلامی دولت جنگریلری پیستیرمهسیگه دوچ کیلگن لیکلری نتیجهسیده دولت ملازملریدن اوچ کیشی جمله دن ایکّی عیال یوق قیلینگنینی بیلدیردی.
کونی کیچه درزاب تومنی حاکمی رحمت الله حشر مذکور تومنده اسلامی دولت جنگریلری کوچلنه یاتگنینی تاکیدلهدی. یقینده اقش نینگ افغانستاندهگی حربیلری باش قوماندانی جنرال جان نیکیلسون اسلامی دولتنی افغانستان خراسان خلافتینی تاسیس ایتیش اوچون سعی و حرکت آلیب باره یاتگنینی بیلدیرگن ایدی. اسلامی دولت نینگ خراسان خلیفهلیگی افغانستان، ایران و پاکستان نینگ ایریم منطقهلری همده مرکزی آسیا دولتلرینی اوز ایچیگه آلهدی.
بوندن بیر نیچه کون آلدین افغانستان جمهور رییسی نینگ بیرینچی اورین باسری جنرال عبدالرشید دوستیم هم کیلهسی تورت آی ایچیده ییتی مینگ کیشیدن آشه راق اسلامی دولت جنگریلرینی شمال ولایتلری اینیقسه بادغیس و بدخشانگه کیلیب جایلشیشی ممکن لیگی بارهسیده گپیرگن ایدی. جنرال دوستیم داعش یا اسلامی دولت جنگریلرینی عراق و سوریه دن افغانستان نینگ شمالی ولایتلریگه کوچیریلیشی بارهسیده ایریم استخبارات منبعلریدن معلومات قولگه کیریتگنینی بیلدیرگن.
داعش نینگ افغانستان شمالی گه کوچیشی و کوچلنیشی بارهسیده خبرلر اوز تصدیقینی تاپگنده اوشبو وضعیت مملکت امنیتی و تقدیرینی جدی مشکللرگه دوچ کیلتیره دیشی طبیعی بیر حال البته. افغانستاننی داعش جنگریلری نینگ مرکزیگه ایلنتیریلیشی منطقه امنیتی اوچون کته تهدید سنه لهدی. عراق و سوریهده غرب و روسیه تامانیدن بیریله دیگن ضربهلرهمده عراق حدودیدن اسلامی دولت جنگریلری نینگ سیقیب چیقریلیشی مذکور جنگریلرنی باشقه حدودلرگه کوچیش لیککه مجبور ایتیشی طبیعی بیر حال و بو آره ده امریکا جنرالی نینگ اسلامی دولتنی افغانستان خراسان خلیفه لیگینی تاسیس ایتیشی ممکن لیگی بارهسیده گی گپلری هم دقت گه سزاوار بیر مساله.
روسیه و مرکزی آسیا دولتلری هم بوندن آلدین بار – بار داعش جنگریلرینی افغانستان ایچکریسیده اینیقسه شمالی ولایتلریده فعالیت آلیب باریشی بارهسیده خواطر بیلدیریب کیلگن ایدیلر. عین حالده اگر داعشنی غرب دولتلری اوزلری نینگ ستراتیژیک مقصدلری اوچون وجود گه کیلتیرگن لیکلری بارهسیدهگی تخمینلر توغری بولسه، مذکور جنگریلرنی منطقه ده روسیه و ختای (چین) منفعتلریگه تهدید اوتکزیشی حقیدهگی تخمینلرنی رد قیلیب بولمهیدی.
معلومکه عراق و سوریه ده یوزلب کیشی مرکزی آسیالیک جنگریلر فعالیت آلیب باره دیلر. مذکور حدودلرده اولر گه قرشی باسیملر کوچه ییشی بیلن اوشبو جنگریلرنی افغانستاندن بولک باشقه جایگه باریشلری ممکن ایمس. چونکه افغانستان نینگ دولت قره ماغیده بولمهگن قطار حدودلری اکستریمیست جنگریلر و ترورچیلر اوچون قولهی جای سنهلهدی.
کونی کیچه داعش گه وفادار جنگریلرنی مرکزی افغانستان نینگ غور ولایتیگه قره شلی غلمین منطقهسیده اوتیزگه یقین محلی اهالینی اوققه توتیب نابود ایتگنی بارهسیده خبرلر نشر ایتیلدی. غور ولایتی نینگ محلی رسمیلری طالبلرگه وفادار بیر قطار جنگریلرنی بوندن انچه وقت آلدین ننگرهار ولایتیگه سفر قیلیب اسلامی دولتگه بیعت بیرگن لیکلرینی تاکیدله یدیلر.
اسلامی دولت جنگریلری نینگ اساسی مرکزی افغانستان نینگ شرقی حدودلری اینیقسه ننگر هار ولایتی نینگ پاکستان بیلن چیگره داش ایریم تومنلریده جایلشگنی هیچ کیم گه سر ایمس. دولت کوچلری بیر نیچه آیدین بیری ننگر هار ولایتیده داعش جنگریلریگه قرشی اوز حربی عملیاتلرینی دوام ایتیب کیلماقده.
افغانستاننی داعش نینگ ینگی مرکزیگه ایلهنیشی ممکن می؟ بو سوالگه زمان اوتیشی انیق جواب بیره آلهدی .
