مملکت تشقی ایشلر وزیرلیگی قندهار ولایتی نینگ اسپینبولدک تومنی پاکستان حربی کوچلری تامانیدن راکتی هجوم آستیده آلینگنی گه عکسالعمل بیلدیریب ایتیشیچه، پاکستان قبوللنگن دیپلماتیک اصوللر و ایکی مملکت آرهسیدهگی کیلیشوولرگه حرمت قوییب، بوندهی هجوملر یوزبیریشی نینگ آلدینی آلیشی کیرهک.
بوگون (جمعه 10- اسد) تشقی ایشلر وزیرلیگی بیر اعلامیه ترقهتیب ایتیشیچه، افغانستان دیورند فرضی چیزیغی اطرافیده تینچلیک تأمین ایتیلیشی گه طرفدار دیر و عین حالده، مملکت امنیتی و مدافعه کوچلری نینگ اهالیدن مدافعه قیلیش و بوندهی هجوملرگه جواب بیریش گه کوچی ییتهدی.
قندهار حاکمی نینگ مطبوعات دفتری بیر اعلامیه ترقهتیب ایتیشیچه، پاکستان حربیلری نینگ راکتی هجوملری عاقبتیده کمیده 15 تینچاهالی هلاک و باشقه 80 تینچاهالی یرهلنگن.
اعلامیه گه کوره، بو حادثه قندهار ولایتی نینگ اسپینبولدک تومنیده یوزبیرگن.
اعلامیه نینگ کوپهیتیریشیچه، پاکستان حربیلری نینگ راکتی هجوملری اوتگن کون (پنجشنبه 9- اسد) قندهار ولایتی نینگ اسپین بولدک تومنیدهگی یشش منطقهلرده صورت تاپگن.
شونینگدیک ملی مدافعه وزیرلیگی بو حادثه نی تصدیقلب ایتیشیچه، پاکستان حربیلری نینگ اسپینبولدک تومنی اوستیدهگی راکتی هجوملریده، 9 تینچاهالی هلاک و کمیده باشقه 50 کیشی یرهلنگن.
اعلامیه نینگ کوپهیتیریشیچه، مملکت حربی مرکزی باشلیغی محمد یاسین ضیا، پاکستان حربیلری نینگ هجوملریگه جواب قیتهریش اوچون، 205 اتل، 201 سیلاب و 203 تندر قول اردو قومندانلیگی نینگ حربیلریگه تیارگرلیک آلیشلری حقیده بویروغ بیرگن.
ملی مدافعه وزیرلیگی گه کوره، پاکستان حربیلری بوندهی هجوملرنی تکرار قیلگن صورتده، افغانستان حربی کوچلری نینگ عکسالعمللریگه دوچ کیلیشی ممکن.
شونینگدیک مملکت تشقی ایشلر وزیرلیگی بوندن آلدین هم پاکستان حربی کوچلری نینگ هجوملرینی قارهلگن ایدی.
