غزنی ولایت رسمیلرینینگ ایتیشیچه، مذکور ولایت ناوَر تومنی اوتکن کیچه طالبلرنینگ گروهی هجومیگه روپهره بولگن.
غزنی ولایت سرپرستی موسیخان اکبرزاده، سلاموطندار بیلن سوزلهشیب، بو هجوم اوتکن کیچه ساعت بیر اطرافیده یوزبیریب و توقنهشوو ایکی تامان اورتهسیده اوچ ساعت دوام ایتکنینی ایتکن.
شونینگدیک، غزنی امنیه قومندانلیگی امنیت آمری اسدالله انصافی، اوشبو هجومنی تصدیق قیلگن، بیراق بو توغریده معلومات بیرمهگن.
بیراق، غزنی ولایت کینگشیدهگی ناوَر خلقینینگ نمایندهسی غلامسخی زابلیگه کوره، بو هجوم مذکور تومن «خوات» منطقهسیدن یوزبیرگن. ناوَر تومنی خوات منطقهسی میدان وردک ولایتی بیلن چیگرهداش بولگن.
جناب زابلی، طالبلرنینگ اوشبو هجومی نتیجهسیده ناوَر تومنی مرکزی یقینیده بولگن بیر امنیتی پوسته قولدن کیتگنی و بیر پولیس یینگیل صورتده یره لنگنینی ایتکن.
شونینگدیک جناب زابلیگه کوره، طالبلر ناوَر تومنی پولیس کوچلرینینگ بیر تانکینی اوزلری بیلن آلیب کیتگن.
انه شوندهی، ولایت کینگشینینگ اوشبو اعضاسی ناوَر تومنی پولیس قومندانلیگیدن تنقید قیلیب ایتیشیچه، بو قومندانلیک مسؤوللری وظیفهلریگه دقت قیلمهگنلر.
باشقه تاماندن، ناوَر تومنی باشلیغی جمعهعلی شفایی، سلاموطندار بیلن سوزلهشیب و طالبلر کینگ صورتده اوچ تاماندن مذکور تومن اوستیگه هجوم اویوشتیرگنینی ایتکن.
جناب شفاییگه کوره، جنگری طالبلر بیرینچی هجومده تومن اطرافیدهگی مخابراتی پایهلرنی ییقیتگن. اوندن کیین تومن اطرافیدهگی قیشلاقلرنی باسیب خلقنی اویلریدن چیقمسلیککه تهدید قیلیب و جنگری طالبلرگه ایشی بولمسلیکلرینی سورهگن.
ناوَر تومنی باشلیغینینگ کوپهیتیریشیچه، طالبلر باسیب آلگن پوستهنی یاندیریب، پولیس کوچلرینینگ بیر تانکی و اوچ موتر سایکلینی اوزلری بیلن آلیب کیتگن.
طالبلر گروهی حاضرگچه بو توغریده هیچ نرسه دیمهگن.
اوتکن 14 ییلده بو بیرینچی مرته طالبلر ناوَر تومنی مرکزی اوستیگه هجوم اویوشتیرگن. مملکت ایچکی ایشلر وزیری نورالحق علومی انچه پیت آلدین غزنی ولایتیگه سفر قیلیب، بوندن کیین مذکور ولایت امنیتی یخشی صورتده تأمینلنیشینی ایتکن ایدی.
