اخیرگی کونلرده تخار ولایتینینگ کوکچه اطرافیدهگی تومنلریده امنیتی کوچ و طالبلر آرهسیده هیچقندی آتیشمه یوز بیرمهگن؛ بیراق اوشبو تومنلردن بدرغه بولگنلرنینگ ارقامی کوپهیب بارماقده.
بدرغه بولگنلرنینگ ایتیشیچه، طالبلر نظارتیگه بولگن منطقهلرده اهالی اوستیگه قطار قانونلرنی قویگن.
دشتقلعه تومنیده مکتب اوقیووچیلریدن بیری بشارت عایلهسی بیلن تالقان شهریده بدرغه بولگن. اونینگ سلاموطندارگه ایتیشیچه، طالبلرنینگ قطار قانونلری باعث دولت رسمیلری، اوقیتووچیلر، یاشلر و باشقه یشاوچیلر بدرغه بولگن.
طالبان گروهی دشتقلعه تومنیده بیر اعلامیه ترقهتیش بیلن، اهالی اوستیگه قطار قانونلرنی قویگن، عیاللرنینگ مکتب و بازار بارمهیشلری و اولرنینگ عقلی تلفونلردن قولنمهیشلری طالبلر تامانیدن قویلگن قانونلردن دیر.
محلی منبعلرنینگ ایتیشیچه، طالبان گروهی نیچه مرته عیاللرنینگ بازار باریش عیبی بیلن جزالنتیرگن.
تخار ولایتی کینگش باشلیغی وفیالله رحمانینینگ ایتیشیچه، کوکچه اطرافیدهگی تومنلرده طالبلرنینگ کوچلی بولیشی باعث یوزلرچه عایله بدرغه بولگن.
جناب رحمانیگه کوره، اخیرگی کونلرده بدرغه بولگنلرنینگ ارقامی کوپهیب بارماقده.
تخار حاکمینینگ سوزلاوچیسی جواد هجرینینگ ایتیشیچه، حاضرده بدرغه بولگنلردن بیللی ارقام قولگه یوق؛ بیراق حکومت و یاردم بیرهدیگن نهادلر بدرغه بولگنلردن بیرقطاریگه یاردم بیرگن.
طالبان گروهینینگ ینگیقلعه، دشتقلعه، خواجهبهاوالدین، درقد، خواجهغار و بهارک تومنلریده کینگ شکلده فعالیتی بار؛ بیراق بدرغه بولگنلردن کپراغی دشتقلعه، خواجهغار و بهارک تومنلرینینگ یشاوچیلری دیر.
