عزت بیبی نینگ حکایه قیلیشیچه: «بوندن بیش ییل آلدین تورموش اورتاغی بولگن زوروانلردن بیری اونهشتیریلگن قیزیمنی اوغیرلب زوردن اوز نکاحیگه آلدی. قیزیم اویلنگندن بیری اوشبو ایرکک تامانیدن اذیت چیکهدی. حتی بعضی پیتلر تیمیرنی قیزدیریب بدنیگه باسگن. نهایتده قیزیم کلثومهنی آتیب اولدیریب جسدینی میدانگه تشلهدی»
عزت بیبی، کلثومه نینگ آنهسی. او عدالت سورهش اوچون پلخمریگه کیلگن. عزت بیبی قیزینی زوردن نکاحیگه آلگن شخص بغلان ولایتی خوست تومنی نینگ وغوی قیشلاغیدهگی ناقانونی قوراللی شخصلردن بیری.
عزت بیبی نینگ ایتیشیچه، مذکور قوماندان قیزینی نیچه بار تیمیر قیزدیریب بدنیگه باسگن. سونگی مرته کلثومه اوییدن قاچیب خوست تومندهگی سینگلیسی نینگ اوییگه باش پنه ایزلهگن. لیکن، کلثومه تورموش اورتاغینینگ تن قوریقچیلری اونی سینگلیسی نینگ اوییدن زوردن چیقاریب نیچه کون حبسدن سونگ، آتیب اولدیریب جسدینی میدانگه تشلهگن.
کلثومهنینگ آنهسی، تورموش اورتاغی قیزینینگ غمیده حیاتدن کوز یومگهنینی ایتهدی. شونینگدیک کلثومه نینگ آتهسی هم نیچه مرته کیاووی تامانیدن اولیمگه تهدید بولگن.
کلثومه سینگلیسی نینگ تورموش اورتاغی محمد آصف، حادثه توغریسیده تیگیشلی امنیتی ادارهلرنی جریانگه قویگن. لیکن، پولیس ایسه حادثه آلدینی آلیشگه موفق بولمهگن.
خوست تومنی امنیه قوماندانی بیلن علاقه قوریش اوچون آلیب بارگن سعی و حرکتیمیز ایجابی نتجیه آلیب کیلمهدی. شونینگدیک بغلان پولیس سوزلاوچیسی هم بو توغریده صحبت بیریشدن باش تارتدی. خوست تومنی نینگ حاکمی غوی قیشلاغی جنگری طالبان نظارتیده دیدی.
بغلان خاتین – قیزلر ادارهسی نینگ باشلیغی خدیجه یقین نینگ تعبیریچه، ولایتده طالبان نینگ فعال بولگنی پولیس بو قبیل واقعهلر آلدی آلینیشی اوچون توسیق یرهتگن.
