افغانستان قیشلاقلرنی رواجلنتیریش وزیرلیگینینگ مسووللری بوگون (سهشنبه) کابلده اوتکزگن خبری انجمنده ایش لایحهسینینگ اوچینچی باسقیچی باشلهنیشی حقیده خبر بیرماقدهلر. قیسقه مددتلی بو لایحه مملکتنینگ 19 ولایتی 77 تومنیده عملگه آشیریلیشی نظرده توتیلگن. مذکور پروژه باشلهنیشی بیلن 295 مینگ کیشی ایش جایی بیلن تامین لنهدی.
قیشلاقلرنی رواجلنتیریش وزیرلیگینینگ سوزلاووچیسی اکبر رستمی، ایش برنامهسی نینگ اوچینچی باسقیچی امریکه و بریتانیا دولتلری تامانیدن توله نیلهدیگن 2 میلیارد و 765 میلیون افغانی حسابیگه عملگه آشیریلهدی دیگن. جناب رسمتیگه کوره، ایش تاپیش لایحهسی آرقهلی هنوزگچه مملکت بویلب بیلیم یورتنی بیتیرگن 1600 مینگ کیشی ایش بیلن تامین بولگنلر.
شونینگدیک جناب رستمی اوتگن ییللرده نورستان، پکتیکا، غزنی و میدان وردک ولایتلریگه اونچهلیک اعتبار بیریلمهگن دیدی. ترقیات لایحه بودجهسی اساسیده بعضی ولایتلرده بیر کیشی اوچون 220 دالر انابتگه آلینگن لیکن محروم قالگن ولایتلرده هر بیر کیشی اوچون 36 دالر بولگن.
قیشلاقلرنی رواجلنتیریش وزیرلیگینینگ مسووللری، بو لایحه بدخشان، دایکندی، غزنی، هلمند، کابل، کاپیسا، لوگر، نیمروز، نورستان، پکتیکا، پنجشیر، پروان، سمنگان، سرپل، ارزگان، میدان وردک و زابل ولایتلریده عملگه آشیریلهدی دیگن.
