تخارده اوچ کوندن بویان کیچه تامان ساعت 5 عصردن باشلب ایرته 5 گچه مخابراتی ترماقلرنی فعالیتی کیسیله‌دی.
بو قرار خواجه بهاوالدین تومنیده طالبان تامانیدن اتصالات مخابراتی ترماغی نینگ 4 ایشلاوچیسی اوغیرلنگنیدن سونگ، آلینگن.
طالبان گروهی اتصالات ایشلاوچی‌لرینی اوغیرلش گه علاوه، آنتن بیرووچی اسکونه‌لرنی اوزلری بیلن آلیب کیتیب و ایتیشیچه، اتصالات مخابراتی ترماغی نینگ مذکور تورت ایشلاوچیسی اولرنینگ بویروغلریگه تَن بیرمه‌گن‌لری باعث، حبس قیلینگن.
تخار یشاوچیلریدن بیرقطاری نینگ ایتیشیچه، خصوصی مخابراتی ترماقلرنینگ فعالیتی توخته‌تیلگن زمانیدن بویان، سلام دولتی مخابراتی ترماق نینگ سیم‌کارتی قیمت بولگن.
تالقان شهری یشاوچیلریدن اسدالله تیمور و نعیم رحیمی نینگ ایتیشیچه، سلام سیم‌کارتی‌نی قیمتی 1 مینگ افغانی گه ییتیشگن.
اولرگه کوره، تخارده حکومت رسمی‌لری نینگ برنامه‌سیزلیگی و مسؤولیت‌سیزلیگی باعث، طالبان گروهی بو ولایتده برنامه‌لرینی عمل گه آشیرماقده.
افغان بی‌سیم مخابراتی ترماغی نینگ انترنتی کیچه تاماندن فعال دییله‌دی، بیراق تخارده مذکور مخابراتی ترماق ایشلاوچی‌لریدن بیری نینگ ایتیشیچه، نیچه کیچه‌دن سونگ اوشبو ترماقنی انترنتی فعالیتی توخته‌لیشی ممکن.
عین حالده، تخار ولایتی بوییچه مخابراتی ریاست مسؤوللری، مخابراتی ترماقلرنینگ بو قرارینی شاشقینچ و قانون گه قرشی بیلیب ایتیشیچه، شمال‌شرق زونی‌ده مخابراتی ترماقلرنی کیچکی فعالیتی مذکور ترماقلرنینگ مسؤوللرینی بویروغی بیلن توخته‌تیله‌دی.
تخار ولایتی بوییچه مخابرات ریاستی باشلیغی غفور تلاش نینگ ایتیشیچه، بیر ییغین آرقه‌لی برچه مخابراتی ترماقلرگه کیچه تاماندن فعالیت‌لری توخته‌تیلمه‌سی توغریسیده بویروغ بیریلگن.
شونینگدیک، تخار پولیس قومندانی حشمت مسلم نینگ ایتیشیچه، مخابراتی ترماقلر اوچون هیچ بیر جدی تهدید یوق دیر و مخابراتی ترماقلرنی بو قراری سیاسی دیر.
تخار پولیس قومندانی گه کوره، کوکچه اطرافیده‌گی منطقه‌لرده مخابراتی ترماقلرنی مرکزی سایتیده وجودگه کیلگن قیین‌چیلیک، امنیتی کوچلر تامانیدن رفع ایتیلگن.
