په کندز کې تیره اوونۍ د بې پولې ډاکترانو پر روغتون د شپې له خوا امریکایي الوتکو بمباري وکړه، چې د بې پولو ډاکټرانو د ادارې د شمېرو له مخې پکې د ۳ ماشومانو په ګډون ۱۰ ناروغان او د بې پولې ډاکټرانو د ادارې (MSF) ۱۲ کارکوونکي وژل شوي دي.
د امريکايي ځواکونو له لوري بمباري د بې پولو ډاکټرانو د بنسټ جدي غبرګونونه را وپارول.
دغه سازمان وايي، چې "مونږ د امریکا متحده ایالتونو، ناټو او افغان ځواکونو له لوري پر نظامي څېړنو باور نه شو کولی." او په دې اړه يې د بې پرو څېړنو غوښتونکی شوی.
د بې پولې ډاکترانو سازمان نن پنجشنبه (اکټوبر ۸ مه ) د يوې خبري ناستې په ترڅ کې وویل، چې دوی د بشري حقیقت موندنې نړېوال کمېسیون (IHFFC) له لوري د څېړنو په لټه کې دي.
د دغې ادارې یوتن د "ستوکس" په نوم په ټينګار سره وویل، په کوم ځای کې چې د امريکايي ځواکونو له خوا بمباري شوې هلته هيڅ ترهګر او طالب موجود نه وو.
همدارنګه د دوی له خوا په خپره شوې اعلاميه کې بیا راغلي، چې د امریکا د متحده ایالتونو د ځواکونو له خوا په کندوز کې د بې پولې ډاکټرانو (MSF) پر روغتون باندې هوايي برید د دوی له پاره تر ټولو لویه ضایعه وه.
د دوی له خوا د امريکا له لوري بريد یو وحشیانه کړنه بلل شوې.
په اعلاميه کې راغلي، چې دا یواځې په روغتون باندې برید نه، بلکه دا د جینیوا په کانوینسیون باندې برید وو او دا برید به هیڅکله هم د زغم وړ نه وي.
دوی غوښتنه کوي، چې د دې پېښې رښتیاوالی او څرنګوالی باید په بې پرې او خپلواکه توګه تر څېړنې لاندې ونیول شي، په ځانګړي توګه هغه متناقض معلومات او څرګندونې چې د امریکا متحده ایالتونو او افغان دولت له لوري د وروستۍ پېښې په اړه ورکړل شوې دي.
یاده دې وي، چې د دې پیښې په اړه د امریکا ولسمشر باراک اوباما بخښنه غوښتې وه.
خو د بې پولې ډاکترانو اعلامیه وایي، دا د منلو نه ده چې د یوه روغتون بمباري او د کارکوونکو او ناروغانو وژلو څخه دې د یو جانبي زیان په ډول سترګې پټې شي او یا دې د یوې تېروتنې په توګه وګڼل شي.
