د ولسي جرګې په نننۍ عمومي غونډه کې د غزني په ولایت کې د ټاکنو حوزوي کېدو پرسر بحث د جرګې غړي په دوو ډلو ووېشل او دغه بحث د شخړو لامل شو.
د ولسي جرګې ځېنو غړیو د غزني ولایت د ټاکنو حوزوي کېدل د اساسي قانون خلاف وبلل او وايي، د غزني اوسېدونکیو په حق کې د ټاکنو کمېسیون او حکومت پرېکړه استبدادي او له تبعیضه ډکه ده.
د جرګې غړی عبدالطیف پدرام وايي، حکومت او کمېسیون د قومپالنې لهپاره په غزني ولایت کې د ټاکنو لهپاره ټول قوانین تر پښو لاندې کړي دي.
دی وايي، دا کار د دې لهپاره شوی دی چې یو خاص قوم واک ته ورسوي او حقونه یې خوندي کړي.
د ولسي جرګې یوشمېر نور غړي د ټاکنو خپلواک کمېسیون او حکومت له لوري په غزني کې د ټاکنو د حوزهيي کېدو له موضوع ملاتړ کوي او وايي، دا پرېکړه د قانون خلاف نه ده او د ټاکنو کمېسیون او حکومت دنده لري د ټول هېواد په کچه ټاکنې ترسره کړي.
د ولسي جرګې غړي کمال ناصر اصولي وویل، دا پر ځای پرېکړه ده. په وینا یې د افغانستان د اساسي قانون پربنسټ باید د دې ولایت ۱۴ ولسوالۍ هم خپل استازي ولري.
د ښاغلي کمال ناصر اصولي او څوو نورو وکیلانو خبرې په جرګه کې د فزیکي او ژبنیو شخړو رامنځ ته کېدو لامل شوې او دغه موضوع د دې سبب شوه چې د جرګې مشر عبدالروف ابراهیمي د جرګې عمومي غونډه پرته له کومې پایلې وځنډوي.
د ټاکنو خپلواک کمېسیون د روانې اوونۍ د دوشنبې په ورځ په غزني کې ټاکنې په درېیو ټاکنیزو حوزو ووېشلې چې دغه موضوع ولسي جرګه کې د غزني استازو له جدي غبرګون سره مخ شوه.
