.jpg)
د ټاکنو خپلواک کمېسیون د دوشنبې په ورځ د کابل او کوچیانو حوزې د ټاکنو لومړنۍ پایلې اعلان کړې.
د ټاکنو قانون پر اساس، د ټاکنو د لومړنیو پایلو له اعلانېدو وروسته، معترض نوماندان تر ۴۸ ساعتونو وخت لري چې د ټاکنیزو شکایتونو کمېسیون سره خپل شکایتونه ثبت کړي.
د ټاکنیزو شکایتونو کمېسیون ویاند عليرضا روحاني سلاموطندار ته ویول چې دې کمېسیون د کابل او د کوچیانو ټاکنیزې حوزې لومړنیو پایلو په تړاو تر تېرې شپې پورې ۱۰۰۰ شکایتونه ترلاسه کړيدي.
د هغه په وینا، دغه شکایتونه به د قانون لهمخې وڅېړل او وروستي شي.
د افغانستان د ازادو او عادلانه ټاکنو بنسټ یا فیفا اجراییوي مشر یوسف رشید وايي، د کابل او کوچیانو ټاکنو لومړنیو پایلو په تړاو د ټاکنیزو شکایتونو کمېسیون چلند د پوښتنې وړ دی.
د ښاغلي رشید په وینا، د څارونکیو بنسټونو لهپاره د ټاکنیزو شکایتونو کمېسیون دریځ کې بدلون او د ټاکنیزو کمېسیونونو چلند غیرمسلکي دی.
د ښاغلي رشید په وینا، د ټاکنیزو شکایتونو کمیسیون باید په جدي او کره توګه شکایتونو سره چلند وکړي او د درغلیو وړ موارده په ډاګه کړي.
د څارونکیو بنسټونو په وینا، د کابل او د کوچیانو حوزې د رایو لومړنیو پایلو سره د ټاکنیزو شکایتونو کمېسیون دریځ، د ثبات او پرېکړې نیونې له پلوه د دغه کمېسیون حقوقي موقف، هم تر پوښتنې لاندې راولي.
د کابل حوزې یو معترض نوماند هارون معترف وايي، د ټاکنیزو شکایتونو کمېسیون باید د کابل حوزې د رایو په باطلولو پرېکړې ټینګار وکړي، ځکه دې ټاکنیزې حوزې کې پراخې درغلۍ شوېدي.
د ټاکنیزو شکایتونو کمېسیون لهدې مخکې د کابل ټاکنیزې حوزې رایې باطلې اعلان کړې وې؛ خو له څه مودې وروسته یې په مشروط ډول خپل دریځه شا تګ وکړ.
د کابل او د کوچیانو حوزې ټاکنو لومړنیو پایلو اعلان د یو شمېر نوماندانو سخت غبرګون سره مخ شو.
معترضو نوماندان د ټاکنو کمېسیون په فساد او رشوت اخېستلو تورنوي، پهداسې حال کې چې د دې کمیسیون مسوولانو له لوري دا تورونه رد شويدي.
