د ولسي جرګې ځېنې غړي د ټاکنو په مدیریت کې د ټاکنو خپلواک کمېسیون په کمزورتیا نیوکه کوي او وايي، د ټاکنو خپلواک کمېسیون د پیسو په اخېستلو او ابتدايي نوملړ کې د نوماندانو نومونو په درجولو سره د تدارکاتو په کمېسیون بدل شویدی.
خو د جرګې د ځېنو نورو غړیو په وینا، د کمېسیون د پخوانیو کارکوونکیو ګوښهکول او د نویو کارکوونکیو ګومارل، د اصولو او قوانینو خلاف کار دی.
د ولسي جرګې لومړی مرستیال همایون همایون ـ چې نن یې د جرګې مشري په غاړه لرله ـ وویل، که څه هم جرګه له ټاکنو وړاندې هم، د ولسي جرګې ټاکنو ترسره کولو په برخه کې د ټاکنو خپلواک کمېسیون پر وړتیاوو بېباوره وه؛ خو ټاکنې د ولسي جرګې د غوښتې خلاف وشوې.
ښاغلی همایون له ولسمشره لویې څارنوالۍ ته د ټاکنو کمېسیون د مشر عبدالبدیع صیاد په ګدون د دې کمېسیون د ټولو کمېشنرانو د معرفي کولو غوښتنه کوي.
هاخوا، د ولسي جرګې غړی ذکریا سودا وايي، کومې پایلې چې د ټاکنو کمېسیون له لوري اعلانېږي، د رایو ورکولو مرکزونو د پایلو پاڼو سره توپیر لري او دا خپله د رایو شمېرلو بهیر کې د پراخو درغلیو ښکارندوي کوي.
د ښاغلي سودا په وینا، شمېرې ښيي چې بدخشان کې د ناامنیو او د دې ولایت د یو شمېر سیمو لارو کې د ستونزو په دلیل، ۳۰ سلنه وګړیو ټاکنو کې ګډون کړی؛ خو تراوسه پورې د دې کمېسیون لومړنۍ پایلې ښيي چې د بدخشان شاوخوا ۶۰ سلنه وګړیو ټاکنو کې حضور کړیدی.
ومو غوښتل دې برخه کې د ټاکنو خپلواک کمېسیون نظر هم ترلاسه کړو؛ خو پر ډېرو هڅو سربېره بریالي نهشو.
