د افغانستان د بیارغونې لپاره د امریکا سرپلټونکې اداره یا سیګار وايي، د ټاکنو خپلواک کمیسیون پخوانی رييس احمد یوسف نورستاني د امریکا له عامه شتمنۍ د غلا په تور د امريکا د يوې محکمې له لوري په ۶ مياشتو کورني بند محکوم شوی دی.
نوموړی به ۳ کلونو لپاره نظارت لاندې هم وي.
نورستاني د سوېلي کلیفورنیا محکمه کې منلې چې د ۲۰۱۵ کال جولای او د ۲۰۱۸ کال ډېسمبر میاشت کې د سفر او خپلې استوګنې په اړه دروغ ویلي او په ناقانونه توګه یې د امریکا د ټولنیزې خیرښېګڼې له بودیجې څه باندې سل زره ډالره ترلاسه کړي دي.
هغه په ناقانونه توګه له يادې اداراې ۲۷ زره ډالره اخيستي او له ۷۳ زره ډالره ډېر يې د درملنې لپاره لګول شوي دي.
