سیلاولر مستقل کمیسیونی نینگ مسووللری، قویاش 1396- ییل‌دن ایکّی آی اوتیشی‌گه قره‌مه‌ی، سیلاولر امنیتی همده بودجه اوچون حکومت هیچ قنده‌ی چاره تدبیر کورمه‌گن دیدیلر. شونینگ اوچون جاری ییل‌ده سیلاولر بولیب اوتیشی امکان‌دن اوزاق دیدی مسووللر.
سیلاولر مستقل کمیسیونی نینگ سوزلاووچیسی همده کمیشنری عبدالبدیع بوگون (سه‌شنبه) کابل‌ده خبری بیر انجمن‌ده، کمیسیون بو توغریده‌گی لایحه‌نی ایکّی آی آلدین حکومت‌گه تاپشیرگن ایدی دیگن. لیکن، هنوزگچه حکومت آرقلی بو مساله‌گه اعتبار بیریلمه‌گن لیگی ایتیله‌دی.
سیلاولر مسقتل کمیسیونی نینگ سوزلاووچیسی، بو اداره موضوع خصوصیده‌گی تشویشلرینی حکومت بیلن شریک قیلگن دیدی. جاری آی نینگ پایانی‌گه قدر حکومت سیلاولرنینگ مالی امکانیتی همده امنیتی اوچون چاره تدبیر کورمه‌گن حالده، بو ییل سیلاولرنی اوتکزیش امکان‌دن اوزاق دیگن او.
سیلاولر حوزه‌سی اوچون 1 میلیون اقش دالری مملکت مالیه وزیرلیگیدن قولگه کیریتگن‌لیکلرینی ایته‌دی جناب صیاد. لیکن، سیلاولر امنیتی ینه مالی مساله‌سی توغریسیده حکومت جدی همکارلیک قیلیشی ضرور دیگن کمیسیون سوزلاووچیسی.
سیلاولر مستقل کمیسیونی نینگ عملیات ایشلری بوییچه اورین باسری وسیمه بادغیسی، بودجه قولگه کیریتیلگن‌دن کیین سیلاولر حوزه‌سی فنی ایشلری تیز آره ده باشلنه‌دی دیگن.
بوندن آلدین هم افغانستانلیک بعضی بیر تحلیلچیلر جاری ییل‌ده سیلاولر اوتکزیلمس‌لیگی خصوصیده خواطر بیدلدیرگن ایدی. بو قیین چیلیکلرگه قره‌مه‌ی، ینه هم جمهور رییسلیک سرایی سیلاولر جاری ییل‌ده اوتکزیلیشی باره‌سیده بار – بار اورغولب کیلگن.
