د بلخ ولایت سلګونو اوسېدونکيو د برښنا لوړ لګښت کمولو لپاره اعتراض کړی. معترضانو د برښنا ریاست د دروازې په تړلو سره خبرداری ورکوي، که چېرې راتلونکيو څو ورځو کې د برښنا لګښت له ۶.۲۵ افغانۍ ۲.۵ افغانیو ته راکم نه کړي، پر کابل به د برښنا مزي پرې کړي او د برښنا لګښت ورکول به تحریم کړي.
اعتراض کوونکي وايي، بلخ کې یو شمېر زورواکي له برښنا ناوړه ګټه اخلي او د مصرف کړې برښنا پیسې نه ورکوي چې حکومت هم یې پر وړاندې پټ خوله دی.
میرویس یو له اعتراض کوونکيو چې د دولت مامور دی وايي، د میاشتې ۶ زره افغانۍ معاش لري چې ۳ زره یې د برښنا لګښت کې ورکوي.
دوو نورو اعتراض کوونکيو او مدني فعالانو باور بامیک او نوریې نجفيزاده له حکومته وغوښتل چې د هر کیلو واټ برښنا بیه ۲.۵ افغانۍ وټاکي.
خو بلخ کې د برښنا رییس حمیدالله حمید وايي، د دغه ولایت د برښنا لګښت کمولو طرحه د ولسمشر محمد اشرف غني له خوا تایید شوې او ټاکل شوې نږدې ورځو کې د بلخ د برښنا لګښت کم شي.
بلخ کې د رهایشي کورونو لپاره د برښنا لګښت بیه هر کیلو واټ ۶.۲۵ افغانۍ، د صنعتي فابریکو لپاره ۶.۷۵ افغانۍ او د شرکتونو، دفترونو او دوکانونو لپاره هم ۱۶.۷۵ افغانۍ ده.
دا لومړی ځل نه دی چې د بلخ اوسېدونکي د برښنا لګښت لوړې بیې نه شکایت کوي، بلکې له دې وړاندې هم شکايتونه شوي وو؛ خو تراوسه ورته پام نه دی شوی.
