اوتگن کیچه نا معلوم قوراللی شخصلر بلخ ولایتینینگ زارع ولسواللیگیده بیر قیزنی تیشهلب اولدیریب و باشقه ایکی گودکنی یرهلنتیرگنی خبر قیلیندی.
بلخ ولایت امنیتی رسمیلریگه کوره، نامعلوم قوراللی شخصلر اوتگن کیچه زارع ولسواللیگیده بیر یشش بناگه کیریب، 11 یاشر قیزنی تیشهلب اولدیریب و باشقه ایکی قیزنی یرهلنتیرگن.
بلخ پولیس سوزلاووچیسی شیرجان درانینینگ سلاموطندارگه ایتیشیچه، حادثه گه قولی بارلیککه عیبلنیب ایکی کیشی حبسگه آلینگن و بو توغریده تیرگاو باشلنگن.
بلخ ساغلیقنی سقلش ادارهسینینگ رییسی میرویس ربیعنینگ سوزلریگه کوره، واقعهده یرهلگن ایکی گودک و بیر جسد ابوعلی سینای بلخی شفاخانهسیگه آلیب کیلینگن.
او، یرهلنگن بیر گودکنینگ ساغلیق احوالی یخشی بولمهگن دیگن.
عینحالده، مذکور گودکنینگ آنهسی قوراللی شخصلر کته قیزینی جنسی زورلشگه اولگورگنلر، اما کته قیزی اویدن قاچیش بیلن 11 یاشیده بولگن قیزی تیشهلهنیب اولدیریلگن و 7-8 یاشیده بولگن ایکی قیزی ایسه یرهلنتیریلگنلیگینی حکایه قیلگن.
زارع، بلخ ولایتینینگ اوزاق منطقهسیده جایلشگن ولسواللیکلردن. ایتیلیشیچه، بو ولسواللیکده اهالینینگ حیاتی جدی معمالر بیلن روپهره بولیب اوتهدی.
بو، افغانستان شمالیده خاتین قیزلرگه قرشی اویوشتیریلگن ایکینچی حادثه سنهلهدی. اوتگن کون ایرتلب بغلان ولایتیده بیر قیز بیلن بیر ایرکک اهالی حضوریده آتیب اولدیریلگن ایدی.
مرکزی بغلان ولسواللیگینینگ ولسوالی گوهرخان بابرینینگ سلاموطندارگه ایتیشیچه، مذکور قیز بیلن بچه «بیسقال» قیشلاغینینگ یشاووچیسی بولگن.
اونگه کوره، اوشبو قیزبیلن بچه بوگون ایرتلب اوییدن قاچه دیگن بیر چاغده قیز عایلهسی تامانیدن اهالی آلدیده اوققه توتیلیب اولدیریلگن. بابری، مذکور قیز بیلن بچه اویلهنیش نیتده بولگنلر دیگن.
ایتیلیشیچه، قیز بیلن بچه یقین قرینداش بولگنلر. بولرنینگ عایلهسی قیز بیلن بچه تورموش قوریش طرفرداری بولمهگنلر. شونینگدیک مرکزی بغلان ولسوالی حادثهده قولی بارلیگی اوچون هنوزگچه بیش کیشی حبسگه آلینگن دیگن.
هنوز هم ناپسند رسم عنعنهلر یاش قیز و بچهلرنینگ حیاتیگه نقطه قوییشگه سبب بولهدی.
بو قبیل حادثهلرنینگ کوپچیلیگی بارهسیده هنوز هم قومی اولتیریشلرده قرار قبول قیلینهدی.
