د کډوالو او بیا راستنېدونکو چارو وزیر سید حسین عالمي بلخي په یوې خبري ناسته کې وویل، چې اروپايي هېوادونه دې افغان کډوالو ته د استوګنې قانوني اسناد ورکړي.
نوموړي دغه خبرې نن د (سپټمبر په ۱۹مه) په یوې خبري ناسته کې کړي دي.
بلخي وايي، په اروپايي هېوادونو کې د مېشتو کډوالو له ۱۰ تر ۲۰ سلنو پورې افغانان دي او باید د دغو هېوادونو مشران ورته بشپړه پاملرنه وکړي.
ده په خبرو کې اروپايي هېوادونو ته د ځوانانو له زیات شمېر تګ څخه خبر ورکړه او پر ځوانانو یې غږ وکړ، چې اروپايي هېوادونو ته دې نه ځي.
نوموړي وویل، د افغانستان اوسنۍ ستونزې د حواري په درشل کې دي.
د کډوالو چارو وزیر په خبري غونډه کې ژمنه وکړه، چې افغانستان به د ملګرو ملتونو عالي کمشنرۍ اجرایوي کمېټې (اکسکام) په کلنۍ ناسته چې په جینوا کې پېلیږي ګډون وکړي .
بلخي وویل، د اکسکام په غونډه کې به په اروپايي هېوادونو کې د افغان کډوالو پر حال څېړنه وکړي.
د اکسکام په سږکنۍ غونډه کې به د کډوالو په چارو کې د ملګرو ملتونو عالي کمیشنر (UNHCR) او ملاتړ کوونکي هېوادونه ګډون وکړي.
ټاکل شوې ده، چې د اکسکام سږکنۍ غوڼدې پرانیسته به افغان ولسمشر غني وکړي.
بلخي وايي، په دې ناسته کې به زیات ټینګار پر ګډوالو وي او په پام کې ده، چې د ګډوالو حالت د ښه والي طرحه افغانستان وړاندیز کړي.
د اکسکام ناسته هر کال په جینوا ښار کې پېلیږي، چې په نړۍ کې د ګډوالو ستونزو د حل له پاره د نړۍ له سراسر څخه له ۹۰ زیات هېوادونه په کې ګډون کوي.
د جینوا دغه ناسته به سږ کال د اکټوبر په ۵ پېل او د همدې میاشتې تر ۹ نېټې پورې دوام وکړي.
د راپورونو پر بنسټ په ۲۰۱۴ کال کې په نړۍ کې د مېشتو ګډوالو ۴۴ سلنه افغان وو، چې زیات شمېر یې ځوانان او کوچنیان په ګوته شوي وو.
