بغلان ولایتی کینگشی رسمی‌لریدن بیری‌نینگ ایتیشیچه، اسلامی دولت گروهی (داعش) مذکور ولایت‌نینگ بُرکه تومنی «تنگۀ مورچ» منطقه‌سیده عسکر آله‌دی.
ولایتی کینگش باشلیغی داکتر صفدر محسنی، بغلان ولایتی‌ده، مذکور گروه فعالیتی‌دن خواطر بیلدیریب آگاه‌لنتیریشیچه، حکومت تامانیدن، داعش گروهی فعالیتی باشقریلمه‌گن صورتده، اوشبو ولایت وضعیتی ننگرهاردن کوره یمان بولیشی ممکن.
جناب محسنی‌نینگ ایتیشیچه، داعش گروهی بغلان ولایتی‌نینگ باشقه منطقه‌لری و مملکت شمالی ولایت‌لریگه فعالیت‌لرینی کینگیتیریش خصوصیده، سعی و حرکت قیله‌دی.
شونینگ‌دیک، بغلان مدنی جماعه‌چیلیک ترماغی مسؤولی محمدعاطف عارفیان‌نینگ ایتیشیچه، داعش گروهی اوزاق مدت‌دن بویان بُرکه تومنی‌ده نفوذ قیلگن و حاضر اوشبو تومن‌نی ایریم منطقه‌سیده قانون چیقارگن. اونگه کوره، داعش گروه اعضاسی خلق‌نی حکومت‌گه قرشی جهادگه چقیره‌دی.
جناب عارفیان، بغلان ولایتی‌ده اسلامی دولت گروهی عسکر آلیشینی خواطرلی بیلیب و حکومت‌نی مذکور ولایت‌ده، داعش گروهی فعالیتی خصوصیده، بی فرق یانده‌شیش‌گه عیب‌له‌یدی.
عارفیان‌نینگ ایتیشیچه، حکومت تامانیدن داعش گروهی مرکزلری و اویه‌لری نابود ایتیلیشی خصوصیده، چاره تدبیر کوریلمه‌گن صورتده، اوشبو گروه یقین آره‌ده بغلان‌نی کوپینچه منطقه‌لریده نفوذ قیلیشی ممکن، او زمان حکومت مذکور گروه فعالیت‌لرینی باشقره‌آلمه‌یدی.
بیراق، بغلان ولایتی بُرکه تومنی باشلیغی عبدالجبار اسلامی‌نینگ ایتیشیچه، اولر هم مذکور تومن‌ده داعش گروهی عسکر آلیش خبرلرینی ایشیتگن و اوشبو گروه‌گه تیگیشلی کیشی‌لرنی تانیش خصوصیده، سعی و حرکت قیلماقده‌لر. جناب اسلامی‌نینگ ایتیشیچه، بُرکه‌ده داعش گروهی فعالیتی بیللی بولگن صورتده، اولرنی نابود ایتیش اوچون، کینگ حربی عملیات یولگه قویه‌دی.
عین حالده، ملی امنیت ریاستی ایکی کون آلدین بیر خبرنامه ترقه‌تیب ایتیشیچه، داعش گروهی اعضالریدن 4 ته‌سینی کابل ولایتی پغمان تومنی‌دن توتقونگه آلگن.
خبرنامه‌ده کیلیشیچه، اوشبو کیشی‌لر ننگرهار ولایتی‌ده تعلیم کورگن و تروریستی فعالیت‌لرنی عمل‌گه آشیریش اوچون کابل کیلگن.
