سنامجلسی اعضالریدن بیرقطارینینگ ایتیشیچه، پاکستان رسمیلری پاریس ییغینیدن فایدهلنیب، تینچلیک سوزلشوولری قیتهدن باشلهنیشی خصوصیده، جمهور رییس غنی بیلن اوچرهشیشنی ایستهیدی. اولر جمهور رییسدن پاکستان برابریده آلگن قراریگه دوام بیریشینی سورهدی.
اوشبو سناتورلرنینگ (یکشنبه کونگی) ییغینده ایتیشیچه، پاکستان رسمیلرینینگ کابلگه قیلگن سفری و جمهور رییس غنینینگ، پاریس ییغینیگه چقیریشیدن مقصد، فرصتدن فایدهلنیب تینچلیک سوزلشوولرینی قیتهدن باشلش دیر.
شوندهی بیرحالده، دیورند چیزیغیدن تشقری سیاسی شخصیتلریدن تشکیل ایتیلگن هیأت اوتکن (پنجشنبه کون 5- قوس) کابل کیلیب و جمهور رییس غنی بیلن اوچرهشگن. اوشبو هیأت محمودخان اچکزی، اسفندیار ولیخان، آفتاب احمدخان شیرپاو، افراسیاب ختک، اسکندر شیرپای، مهندس شکرالله خان، ایاز وزیر، سلیم خان و عثمان کاکر ارا تشکیل ایتیلگن.
سنامجلسی باشلیغی فضلهادی مسلمیارنینگ بو توغریده ایتیشیچه، پاکستان رسمیلری برابریده جمهور رییس غنینینگ قراریدن حمایه قیلهدی. شونینگدیک، سنامجلسی اعضالریدن بیری نثاراحمد حارثنینگ ایتیشیچه، پاکستان حاضرگچه افغانستان تینچلیگی خصوصیده، هیچ بیر ایش قیلمهگن و جمهور رییس غنی، مذکور مملکت برابریدهگی قراریگه دوام بیریشی لازم.
شوندهی بیرحالده، جمهور رییس غنی خلق ارا «اقلیم اوزگرتیریش» ییغینیده اشتراک ایتیش اوچون، فرانسهگه یول آلدی. جمهور رییس سوزلاوچیسی اورین باسری سیدظفر هاشمینینگ، اوشبو سفر توغریسیده سلام وطندارگه ایتیشیچه، بو ییغینده 130 دن آرتیق دنیا مملکتلری نمایندهلری ییر اقلیمی ایسیق بولیشینی باشقریش خصوصیده، بیر ییرده توپلهنیب بحث اوتکزهدی. هاشمیگه کوره، جمهور رییسنینگ سفری لایحهسیده، پاکستان رسمیلری بیلن اوچرهشوو موضوع جایلشتیریلمهگن.
بیراق، جمهور رییس مصلحتچیلریدن بیری اکرم خپلواک، پاریسده اوتکزیلهدیگن اوچ تامانلمه اولتیریشده جناب غنینینگ اشتراکیدن خبر بیرهدی. جناب خپلواکنینگ ایتیشیچه، بو اولتیریشده پاکستان رسمیلری هم حضور تاپیشی ممکن.
شوندهی بیرحالده، جمهور رییس بو سفرده قوشنی مملکت رسمیلری بیلن اوچرهشگن صورتده، بو اوچرهشوودن اوشبو مملکت رسمیلرینینگ امتیازی نیمه بولر ایکن؟
سیاسی ایش بیلرمانلردن بیری فاروق بشرنینگ اوشبو سوراققه جواب ایتیشیچه، پاکستان رسمیلری بو اولتیریشده جمهور رییس غنی بیلن اوچرهشیب، صداقتینی امیریکه قوشمه ایالتلری و غربی مملکتلرگه اثباتلب و بو بهانه بیلن کوپینچه امتیاز قولگه کیریتهدی.
حکومت باشلیغلری، ملی بیرلیک حکومت تشکیل ایتیلگنیدن کیین، پاکستان بیلن علاقهسی یخشیلنیشی خصوصیده، کوپلب سعی و حرکت قیلدی. بیراق مملکت ایریم منطقهلریده تروریستی هجوملر کوپهیگنی باعث، اوشبو موضوع اوزگردی و جمهور رییس غنی، بو هجوملر خصوصیده، نیچه مرته پاکستاننی عیبلهدی و ایکی مملکت علاقهسی قیتهدن یمان بولدی.
