د بغلان ولایتي امنیتي سرچینو سلاموطندار سره خبرو کې ویلي، د طالبانو بریدونو له کبله چې له تېرو ۱۰ ساعتونو راپهدېخوا یې د دې ولایت په بېلابېلو برخو کړي، ۱۲ کسان وژل شوي او نږدې ۱۰۰ نور ټپیان دي.
په همدې حال کې د بغلان عامې روغتیا ریاست مرستیال عبدالعلیم غفاري وايي چې یوازې په پلخمري ښار کې له ۵۰ ډېرو نظامي او ملکي کسانو ته مرګژوبله اوښتې ده.
د نوموړي په وینا، د ملکیانو په ډله کې ښځې او ماشومان هم شامل دي چې د طالبانو توغندیزو بریدونو کې ټپیان شوي دي.
د راپورونو له مخې د بغلان ولایت په مرکزي بغلان، نهرین، تالهوبرفک، دوشي او برکه ولسوالیو او د پلخمري ښار یوشمېر سیمو کې د افغان ځواکونو او طالبانو ترمنځ هم نښتې روانې دي چې له کبله یې لسګونو نظامي او ملکي کسانو ته مرګژوبله اوښتې ده.
بلخوا راپورونه ښيي چې هرات کې هم د دفاعي ځواکونو ۲ سرتېري وژل شوي او ۷ نور ټپیان دي.
هرات کې د ټاکنو خپلواک کمېسیون ولایتي دفتر مسوولانو په وینا، وسلهوالو طالبانو د دې ولایت په کشککهنه، کشکرباطسنګي، کهسان، کرخ، چشت، پشتونزرغون، غوریان، انجیل او ګذره ولسوالیو کې پر یوشمېر ټاکنیزو مرکزونو بریدونه کړي دي.
د یاد دفتر د خبرپاڼې له مخې، د دفاعي ځواکونو موټر چپه کېدو له امله ۲ سرتېري چې کشکرباطسنګي ولسوالۍ ته یې ټاکنیز توکي لېږدول وژل شوي دي. پهدغې پېښې کې ۳ سرتېري ټپیان شوي هم دي.
د خبرپاڼې پر بنسټ د دې ولایت کهسان ولسوالۍ اړوند په دوو ټاکنیزو محلونو کې د ماین چاودنې له امله ۲ کسان ټپیان شوي دي.
خبرپاڼه زیاتوي، له نن سهار راهیسې د هرات ولایت یوشمېر ولسوالیو کې پر څو ټاکنیزو مرکزونو بریدونه کړي، خو د امنیتي ځواکونو له کلک غبرګون سره مخ شوي دي.
