بغلان محلی مسووللری، بغلان اوچون قوراللی طالب‌لرنینگ سابق و حاضرگی والیسی اورتهسیده دندغوری تومنی‌ده آتیشمه یوز بیرگنی باره‌سیده خبر بیرگن‌لر.
بغلان پولیس قوماندانلیگی‌نینگ سرپرستی همده خوفسیزلیک آمری امیرگل حسین‌نینگ سلام‌وطندارگه ایتیشیچه، بغلان اوچون حاضر قوراللی طالب‌لرنینگ والیسی ایتیب تعین‌لنگن مولوی حلال‌گه صادق کیشی‌لر بیلن و مذکور ولایت اوچون قوراللی طالب‌لرنینگ سابق والیسی مولوی یونس اورتهسیده اوتگن کون (یک‌شنبه) اوروش یوزبیرگن.
آتیشمه عاقبتی‌ده مولوی یونس‌گه طرفدار جنگریلردن 4 کیشی قربان بولگن و ایکی تامان دن 7 کیشی تن جراحتی آلگن.
بغلان خوفسیزلیک آمری، طالب‌لرنینگ اوشبو ایکی قوماندانی عشر و زکات، عسکرلیک‌که آلیش همده نظارت‌لریده بولگن منطقه‌نی بولیش اوستی‌ده کیلیشمه‌گنلر دیگن.
بغلان محلی مسووللری، دندغوری تومنی‌نینگ یشاوچی‌لری قوراللی طالب‌لرنینگ ظلم ستمی‌دن حوصله‌لری پیر بولگن لیگینی تیل‌گه آلگن‌لر.
جنگری طالب‌لر اهالی‌دن ییغیه دیگن عشر و زکات بیلن اوز خرجت‌لرینی تامین قیله‌دی دیگن دندغوری تومنی نینگ اهالی‌سی.
عصیانچی طالب‌لرنینگ ظلمی‌دن حوصله‌سی پیر بولگن منطقه‌نینگ قوم یاش اولوغلریدن حاجی خیال جان، قیشلاق‌لری قورال‌لی‌لرنینگ اوروش میدانی‌گه ایلنگن لیگینی اظهار قیلگن.
بوندن بیر هفته آلدین هم ولایت‌نینگ دندغوری تومنی‌ده قوراللی طالب‌لر نینگ ایکی قوماندانی اورتهسیده روی بیرگن توقنشووده ایکی تامان‌گه وفادار 13 کیشی عالم‌دن اوتگن ایدی.
